Winterwarm en lekker. Hierdie doopsous is ryk en veral heerlik saam met geroosterde wintergroente. Jy kan dit ook soos ’n warm slaaisous oor die groente gebruik. Dit maak ook van geroosterde lamsvleis iets spesiaals; bedruip die vleis daarmee sodra dit uit die oond kom. Heerlik!
Wintergroente om in die sous te doop
klein worteltjies met stingels aan, in die lengte middeldeur gesny
klein witwortels, in die lengte middeldeur gesny
klein beetknolle, in kwarte gesny
2 patats met skil, in klein wiggies gesny
30 ml (2 e) olyfolie
10 ml (2 t) heuning
paar tiemietakkies
Doopsous
1 knoffelknol, bokant afgesny
30 ml (2 e) olyfolie
paar tiemietakkies + ekstra
125 g ansjovisfilette in olie
95 ml (1⁄3 k + 1 e) olyfolie
160 ml (2⁄3 k) ongesoute botter, in blokkies gesny
60 ml (¼ k) dubbeldikroom
Instructions
Ekstra op die bord vir die voorsitslag bitter blare, soos radicchio en witloof geblansjeerde Franse groenboontjies
Voorverhit die oond tot 180 °C.
1 Sit die groente op ’n oondpan en drup die olie en heuning oor. Sit die tiemie bo-op en rooster tot net gaar.
Doopsous: Sit die knoffel in ’n dieperige oondpannetjie. Gooi die olie oor en sit die tiemietakkies bo-op. Bak vir 30 min. saam met die groente tot die knoffel sag is.
2 Haal die knoffel uit en druk die sagte vlees uit die skilletjies. Hou eenkant. 3 Maak ’n middelslagkastrol halfvol water en laat prut. Sit die gaar knoffel en ansjovisfilette in ’n bakkie wat mooi oor die kastrol pas. Druk met ’n vurk fyn. 4 Voeg nou die olie bietjie vir bietjie by en roer deurentyd met ’n vurk. Voeg die botter by en roer steeds. Roer tot die botter gesmelt is en die mengsel begin verdik. 5 Roer die room by en skep die bagna càuda in ’n mooi opdienbakkie met ’n paar ekstra tiemietakkies. Pak die geroosterde groente, blare en groenbone om die doopsous en smul.