Versier jou tuin vir Valentynsdag deur Cobus Smit en Lien Botha. Hierdie artikel het oorspronklik in die Februarie 2012-uitgawe van rooi rose verskyn. Alle foto’s: Lien Botha
My Valentuin!
Plant plante in die kleur en geur van die liefde en vier Valentynsdag in die tuin. Hier is Cobus Smit en fotograaf Lien Botha se romantiese planne vir hoe jy vanjaar jou liefde buite kan vier.
1. Sê dit met ’n roos …
Mnr Tuin SA, Keith Kirsten het met hierdie sensuele Iceberg ‘Burgundy’ vorendag gekom. Die intense wynrooi, amper pers kleur kan kwalik nagedoen word om jou liefdesboodskap oor te dra. Dit
sal met genoeg voeding net so goed in ’n groot genoeg pot as in die grond aard.
2. Met rose besaai …
Nog ’n tuinplan vir Valentynsdag vir diegene wat net balkonne het. Versier ’n fontein in ’n openbare park met rose en gaan eet ’n heerlike ontbyt of drink ’n drankie ná werk en stap “toevallig” daar verby.
3. Waar die hart van vol is …
Hang jou liefde aan die tuinhekkie – moet dit nie onder ’n maatemmer bêre nie. ’n Oudagse tuinhekkie kan maklik dien as die agtergrond vir ’n onvergeetlike romantiese dag. Versier dit met hout-en-metaal-harte. G’n mens sal nie voor so ’n liefdesaanbod swig nie!
Versier jou tuin vir Valentynsdag
4. As ek my vreemde liefde bloot moes lê …
’n Liefdesverklaring in hout op die rand van die grasperk voor ’n welige, vars opgeknapte bedding in die tuin sal enige Valentyn se hart week maak.
Versier jou tuin vir Valentynsdag
5. Vir jou het ek mos lief …
Die mense wat ek liefhet, kom groei op my soos mos – Stephan Bouwer.
Vra ’n blomkunstenaar om ’n hart te maak met sphagnum-mos. ’n Bietjie water elke dag sal dit maande lank groen laat bly. Of plaas bloot ’n mosbegroeide klip in ’n potjie vol grond en hou dit klam. Die regte boodskappie daarby sal die ding doen!
Lees Meer
