Klinies gesproke is koors ’n normale fisiologiese reaksie wat die liggaam in staat stel om infeksie te beveg. Daar is egter verskeie realiteite wat dit ook vir ouers moeilik maak om koorsigheid reg te hanteer.
Eerstens is dit belangrik om te besef dat koors ’n teken van ernstige siekte kan wees, terwyl dit ook ’n indikasie is van ’n kind se normale reaksie op infeksie. Hierdie is een van die primêre redes waarom ouers dikwels bekommerd is oor ’n kind se koors.
Koors is ongemaklik en ontstellend vir die kind, en geen ma wil hê haar kind moet onnodig gespanne raak nie. Daarom is dit belangrik om die regte stappe te neem wat die kind vinnig sal laat herstel.
Wanneer ouers hul kind se koors dophou, is dit belangrik om eerste op die kind se gemak te fokus, en daarna op sy/haar liggaamstemperatuur. Wanneer die koors tot pyn en aansienlike ongemak bydra (soos ’n hoofpyn), is die gebruik van pynstillers toepaslik. Verder is dit ook belangrik dat ouers vertroud raak met duidelike riglyne wat deur dokters voorgestel word oor hoe kinderkoors hanteer moet word.
Wenke wat werk!
- Moenie jou kind te dik of te dun aantrek nie. Trek vir hom/haar koel, ligte klere aan en bedek hom/haar moet ’n ligte kombersie.
- Verlig pyn. Gebruik goedgekeurde pediatriese produkte wat die kind se ongemak en/of pyn sal verlig.
- Vloeistowwe. Kinders verloor water tydens koors, wat veroorsaak dat hulle dehidreer. Maak seker hulle drink genoeg koue vloeistowwe.
- Liefde wen. Daar is niks meer vertroostend vir ’n benoude kind as die liefde van sy/haar ouers nie.
