Het ‘n vas nadele? Deur Salomé Delport. Foto: pexels
Hierdie is artikel 5 in ’n reeks van 14 waar Salomé dagboek hou van haar vas-ervaring PLUS bykomende inligting verskaf.
Lees die artikel op bl. 60 in die September 2018-uitgawe en volg ons daaglikse artikels om meer uit te vind.
Vrydag Dag 5
’n Vriendin vra uit oor hoofpyn terwyl jy vas: Sy is ’n dieetkundige en sê hoofpyn is baie algemeen as jou bloedsuiker val, soos wat gebeur as jy vas.
Verskillende sienings oor hoofpyn en vasdiëte
Die alternatiewe terapeute sê hoofpyn terwyl jy vas is ’n teken dat jou liggaam besig is om gifstowwe uit te skei. Volgens hulle probeer jou liggaam jou teen gifstowwe beskerm. Daarom stoor dit gifstowwe in die vetweefsel, weggebêre waar dit geen skade doen nie. Maar wanneer jy so dieet dat die vetjies wegsmelt word die toksiese stowwe in daardie kilogramme vet vrygelaat in jou gestel, waar dit tipies hoofpyn veroorsaak en/of jou moeg en sleg laat voel. Die hoofpyne verdwyn soos jou liggaam die gifstowwe uitskei.
Ek het sover nie hoofpyn nie maar ek gaan lees op, en sien gou dat vas en lae bloedsuiker een van die wyd erkende snellers van hoofpyn en selfs migraine is. Daar is verskeie teorieë en hoogs tegniese verklarings daarvoor, soos die balans tussen die eksitore in die brein, depolarisasie, en so aan. Om dit te verstaan is vir die meeste van ons onnodig. Ons wil maar net beter voel.
Hoe vastende hoofpyn voel
Volgens ’n artikel in die Current Pain Headache Report ontwikkel sommige mense hoofpyn as hulle vas. Mense wat normaalweg maklik hoofpyn kry, is ook meer geneig tot hoofpyn terwyl hulle vas. Tot soveel as die helfte van vastendes kla van hoofpyn.
Hoofpyn ontwikkel gewoonlik eers na sestien uur van vas. Die regverdigbare afleiding is dan sekerlik dat mense op die 16/8 dieet ’n kleiner risiko op hoofpyn het as mense wat die 5/2 of die alternatiewe dag-vas volg. Die hoofpyn verdwyn binne 72 uur nadat mens weer begin eet. Volgens hierdie artikel ervaar mense hoofpyn terwyl hulle vas oor die voorkant van die hoof. Dit is meestal ’n dowwe, ligte, nie-kloppende hoofpyn.
As jy as deel van jou vas koffie en tee uitsny kan jy ook hoofpyn weens onttrekking kry.
Planne met hoofpyn terwyl jy vas
Vermoedelik is dehidrasie by die meeste van ons die onderliggende probleem. Dus is ekstra water die beste oplossing, eerder as ’n hoofpynpil.
Onthou, baie van jou daaglikse water kom uit jou kos. Vrugte en groente bevat baie water – rondom 80%! So 86% van ’n appel se volume (gewig ook) is water. As jy ’n appel eet wat min of meer so groot soos ’n koppie is, “drink” jy eintlik ’n driekwart koppie water. Ons tel dit nie as water nie en drink dan nog sowat 1,5 liter water per dag. Terwyl jy vas is daar nie kos wat water kan bydra nie. Daarom moet jy nou eintlik meer water drink.
Is daar ander nadele aan vas?
Nie eintlik nie, behalwe dat jy kan honger voel en buierig kan wees, veral nader aan die einde van jou vastyd. Jou konsentrasie kan dan ook swakker wees. Die enigste ander nadeel is dehidrasie.
Oor na jou
Kry jy hoofpyn as jy vas? Watter soort vas volg jy? Help dit as jy bietjie meer water drink? Laat weet hoe jy dit ervaar?
Groete (en gesondheid!) Salomé
Lees ook
Nota
As jy ’n diabeet is of dink dat jy dalk insulienweerstandig is of metaboliese sindroom het, al met anoreksie of bulimie gediagnoseer was of aan enige ander chroniese siekte ly, of lewer- of nierprobleme het moet jy liewer met jou dokter gesels voor jy enige vorm van vasting aanpak. Die vasdieet is ook nie geskik vir kinders, swanger vroue en bejaardes nie.
