Uitoorlê die ouderdom!

Vestig die gewoonte om gereeld te ontspan sodat jy nie uitbrand nie. Of dit nou joga, meditasie, ’n stappie op die strand of in die natuur, ’n kaalvoetstaantydjie in jou tuin, of ’n skuimbad by kerslig is – vyftien tot 20 minute maak die wêreld se verskil. Besluit hoe dikwels jy dit gaan doen, en hou daarby. Beplan dit slim om by jou roetine in te pas.
Ignoreer die senior afslag op aankope. Dit versterk die vals idee dat jy ouer en swakker word, nie meer so produktief is soos vroeër nie en dat ander na jou moet omsien. Natuurlik is daar uitsonderings, maar dink mooi voor jy die afslag gebruik.
Vestig ’n gereelde oefenroetine. As jy die dag nie lus voel om te gaan stap of jou oefeninge te doen nie, trek jou oefenklere aan en neem jou voor om slegs tien minute te oefen. Soms verdwyn die weerstand.

Let op die uitwerking van negatiewe nuusberigte op jou. Verminder jou blootstelling daaraan. As iets werklik ingrypends gebeur, sal iemand jou daarvan vertel.
Leer om jouself uit te druk sonder om voortdurend te bekommer dat jy ander se gevoelens sal seermaak. Hulle is vir hul eie emosionele welsyn verantwoordelik; moenie namens hulle besluit wat hulle kan hanteer of mag hoor nie. Knoop ’n gesprek aan as jy spanning aanvoel en stryk die saak uit.
Vra jou liggaam wat dit nodig het om te genees en te floreer. Ernstig: raak stil, fokus na binne en wag vir ’n antwoord. Jy sien dalk die beeld van jouself op ’n bed wat beteken jy het rus nodig, of van ’n suurlemoen wat kan aandui dat jou liggaam ’n bietjie moet detoks. As jy geen ‘antwoord’ kry nie, vra jou liggaam voor jy gaan slaap en stel die intensie om die antwoord te kry sodra jy wakker word.
Strek soos ’n kat. Onderbreek jou sittende posisie voor die rekenaar of waar ookal en verbeel jou jy is ’n kat. Gaap en rek jou uit – dis pret! As ander jou skeef aankyk, kan hulle gerus meedoen. Doen dit ’n paar keer per dag.Wees nuuskierig en speels en gryp groeigeleenthede aan, al voel jy skrikkerig. Leef voluit en geniet elke ervaring.
Kyk uit vir “ageless goddesses” om jou te inspireer. Jy sal hulle herken, op straat of waar ookal! Bekendes sluit Meryl Streep, Helen Mirren en Jane Fonda in.