Tien wenke as jy ’n eiendom verhuur

Versorg deur Mariette Snyman. Foto baona/istock images

Al meer Suid-Afrikaners verdien geld deur ’n huis, woonstel, kothuis, kamer of ander vorm van akkommodasie uit te huur.

Hier is Claire se tienpuntplan om die talle probleme wat verhuurders kan teëkom te help aanspreek:

Sorg vir ’n geskrewe kontrak wat jou vereistes uitspel, onder meer hoe betaling moet geskied en wat die som in- en uitsluit. Wi-fi, DSTV, sekuriteitstelsels, tuin- en swembadonderhoud, skoonmaak en voorwaardes rakende beskadiging van die eiendom of die inhoud daarvan moet in detail hanteer word.
As ’n potensiële huurder nie aan jou voorwaardes kan of wil voldoen nie, moet julle oor die besonderhede ooreenkom en ’n aangepaste kontrak opstel voor jy hulle laat intrek of laat oorbly.
Verskaf akkurate inligting wanneer jy jou eiendom adverteer. Enige wanvoorstelling, oordrywing of weglating van ’n kritiese feit kan daartoe lei dat jy nie die betaling ontvang nie.
Gaan ’n huurder se verwysings en besonderhede na. Verifieer hul telefoonnommer en e-posadres. ’n Professionele agent behoort toegang tot die Tenant Profile Network (TPN) te hê.
Maak ’n volledige, opgedateerde inventaris van alles in of op die eiendom, en die toestand daarvan.

Laat duidelike instruksies (in ’n vriendelike toon) vir huurders wat enige ooglopende kwessies soos sekuriteitsinligting, Wi-fi wagwoord, kontaknommers en enige onduidelikhede uiteensit.
As jy ver van die eiendom woon, is dit beter om ’n plaaslike persoon aan te stel om die eiendom te oorsien.
Sorg dat jy of die eiendomsbestuurder die huurder in persoon kan ontmoet wanneer hulle intrek of opdaag om oor te bly. Inspekteer ook die eiendom so gou moontlik nadat die huurder vertrek het sodat jy seker is daar is geen skade nie.
Verskaf ’n lys van kontakte vir noodgevalle: loodgieter, elektrisiën, dakhersteller, sekuriteitsdiens, sleutelmaker, skoonmaker, polisie en ambulans.
Lewer goeie diens. Dit mag baie moeite verg, maar die huurder voel hulle bestee swaarverdiende geld aan skoon, redelike akkommodasie wat al die geadverteerde geriewe verskaf. As iets skeefloop, tree onmiddellik op om dit te herstel en wees daarvan bewus dat ’n terugbetaling nodig mag wees indien dit ’n wesentlike kwessie was.