Tasché Burger, eerste vrou én jongste wenner van The Voice SA

Tasché Burger, eerste vrou én jongste wenner van The Voice SA – Deur Zoë Salzwedel. Foto’s: Verskaf

Tasché Burger is gisteraand aangewys as die derde wenner van M-Net se The Voice SA-reeks in die Mosaïek Teater in Fairland, Johannesburg. En dít skaars ʼn week na haar 19de verjaarsdag.

Lees ook: Ontmoet The Voice SA se jong Tasché Burger

Tasché sing reeds van kindsbeen af en wou nog altyd vir The Voice inskryf. Nadat sy verlede jaar gematrikuleer het, het sy sanglesse begin neem en deeltyds as kelnerin gewerk. Toe sy 18 word – die ouderdomsperk vir inskrywings – het sy besluit om haar droom na te jaag en vir The Voice SA in te skryf.

Vir haar oudisie het Tasché Koos Kombuise se “Lisa Se Klavier” gesing. Haar unieke stem en spesiale weergawe van dié gewilde liedjie het verseker dat al vier die mentors – Ricky Rick, LIRA, Riana Nel en Francois Van Coke – hulle stoele vir haar gedraai het.

Met ’n “four chair turn” moes Tasché ʼn moeilike besluit neem: Wie gaan sy kies om as haar mentor vir The Voice SA op te tree?

Die besluit het die potensiaal gehad om haar lewe vir altyd te verander, en met ’n ateljee-gehoor wat almal saam “Francois! Francois! Francois!” gedreunsing het, het Tasché die Afrikaanse rocker, Francois van Coke, gekies. En só was sy die tweede lid in #TeamVanCoke!

Kyk gerus hier na Tasché se oudisie:

Met hope talent, passie en haar ooglopende liefde vir musiek het Tasché diep in die harte van miljoene Suid-Afrikaners ingekruip. Volgens Kaye-Ann Williams, die hoof van plaaslike produksies by M-Net, was daar tydens vanjaar se seisoen ’n rekordgetal van byna 10 miljoen stemme. Volgens Williams was Tasché dwarsdeur die reeks ʼn groot gunsteling onder aanhangers. Williams het ook gesê dat die verskil in stemme tussen die tweede plek (Soné Joubert) en derde plek (Siki Jo-An) “baie klein” was.

Tasché besef dat haar lewe nou heel waarskynlik handomkeer gaan verander, maar sy sien uit na die avontuur. Sy is opgewonde daaroor om haar musiek met aanhangers te deel, en hoop om haarself oor 5 jaar as ’n gevestigde kunstenaar te sien wat ’n verskil maak in ander se lewens. “Solank ek net kan sing, is ek gelukkig.”