Swangerskapbewustheidsweek

Hooffoto: pexels.com

Beplande swangerskappe is ’n kosbare tyd in die ouers se lewe. Swangerskap word dan die tyd waarin ouers fisies, emosioneel en finansieël vir kleinding se aankoms voorberei. Nogtans is duisende swangerskappe onbepland en kan dit lei tot ’n emosionele op-en-af-reis vir die ouers sowel as vir die baba. Voorkoming van ontydige swangerskappe is beide ouers se verantwoordelikheid op dieselfde manier as wat die versorging en grootmaak van ’n kind beide ouers se aandag verg.

In Suid-Afrika was 40% van dogters tussen 14 en 19 jaar reeds een keer swanger. 50% van hulle word vir ’n tweede keer voor die ouderdom van 19 swanger. Tussen ’n half en een miljoen babas wat jaarliks gebore word, se ma’s is nog tieners. Swanger tieners ervaar dikwels weinig ondersteuning en begrip. Hulle hoor en ervaar eerder veroordeling van ouers, onderwysers, verpleegkundiges, geloofsgemeenskappe en selfs hul vriende. Jong pa’s is dikwels traag om verantwoordelikheid te neem of word deur families verhinder om betrokke te raak. Baie swanger dogters beleef depressie wat tot nageboortedepressie kan bydra en potensieel tot selfmoord kan lei. Tienerswangerskappe word soms ook beleef as ’n verbrokkeling van ’n lewensdroom. ’n Studie wat deur UNISA se onderwysdepartement onderneem is, het aangedui dat die meeste swanger tieners ’n gebrek aan seksonderrig as hul hoofrede vir swangerskap gee. In die lig van hierdie situasie behoort die skok van onderwysers en selfs skoolhoofde wat met seksuele gedrag by kinders betrokke raak, ons almal tot aksie te laat oorgaan.

Die Suid-Afrikaanse Vroue Federasie FAMNET het tot aksie oorgegaan, omdat hulle besef het dat ’n baba wie se ma self ’n kind is en onder veroordeling leef, min kans het om as ’n gelukkige, gesonde, intelligente en verantwoordelike kind groot te word. Hierdie sirkel moet verbreek word. Rebuilding Dreams is ’n program wat die uitdagings van tienerswangerskappe aanspreek en leiding gee oor goeie ouerskap, insluitende pa-betrokkenheid. Groepleiers word opgelei om 14 sessies groepwerk met tienerouers te doen. In die proses word die tiener begelei om opnuut te droom en stappe te neem om drome vir hulself en hul kinders se toekoms te laat waar word. Die SAVF bied 4 keer per jaar die opleiding in Pretoria aan. Die volgende opleidingsgeleentheid is op 13 Februarie. Opleiding word ook op versoek elders aangebied.

Hierdie opleiding is waardevol vir mense wat enige plek in gemeenskappe werk. Skole en klinieke en daarom ook die Departemente van Onderwys en Gesondheid behoort betrokkenheid by hierdie program ernstig te oorweeg.

Ander beskikbare hulp kan hier gekry word: Verwagtende moeders wat staatsklinieke bywoon word nasionaal by die Departement van Gesondheid geregistreer en ontvang weekliks SMS-boodskappe met inligting oor die baba se ontwikkeling en riglyne vir swangerskap en selfs na-geboorte sorg. As ma’s dit nie kry nie, moet hulle navraag doen by hul plaaslike kliniek. Verskeie apps kan op slimfone afgelaai word soos “Baby center,” “Ovia Pregnancy,” “Nurture,” “What to expect” en “The Bump.”

Vir meer inligting oor Rebuilding Dreams, skakel Erna Rheeder by 084 3839 417 of stuur ’n e-pos aan [email protected]