Die tema, Fantastiese 15/Fabulous 15/Zemikhosi 15, fokus daarop om gemeenskappe van regoor die Wes-Kaap bymekaar te bring om fees te vier en die plaaslike kunste te ondersteun.
Die fees beoog ook om belowende jong kunstenaars van plaaslike gemeenskappe tussen die ouderdom van 9 en 25 te identifiseer. Sodoende word dié jong kunstenaars ’n platform gegee om hul talente te ontwikkel en ontvang hulle mentorskap van professionele kunstenaars en gesoute rolspelers in die bedryf.
Die eerste vyf finaliste van die talentsoektoeg in die Paarl is reeds gekies en dring deur na die volgende rondte. Hulle is:
- Shockwaves (dansgroep)
- Ryan Popper (dans)
- Nicole Ashley Mc Thomas (drama en dans)
- Keanan Swarts (drama)
- Rouxné Muller (sang)
Die talentsoektog duur voort met ’n geleentheid wat op Saterdag, 14 Oktober plaasvind by die Breytenbach Sentrum op Wellington. Dit word gevolg deur nog ’n geleentheid by die Guga S’Thebe Kuns en Kultuursentrum in Langa op Saterdag, 21 Oktober van 10:00 – 6:00. Ander venues wat besoek gaan word sluit in:
- Die Magnet Teater in Observatory op Saterdag, 28 Oktober 2017
- Die Stage in Bellville op Saterdag, 4 November 2017
Die kwalifiserende rondtes se beoordelaars sluit in die Sne Dladla (akteur), Riaan Visman (kunstenaar), Lindi Smit (regisseur) en Louis du Preez (klassieke musiekkenner). Die finale uitdunrondte vind plaas op 28 April 2018 as deel van die jaarlikse Suidoosterfees in Kaapstad.
Hoogtepunte van die 2018 Suidoosterfees sluit in Emo Adams, Bobby van Jaarsveld en Katlego Maboe in ’n swing-optrede met Kaapse- en Karoo-klanke. Bekendes soos Shaleen Surtie-Richards, Vinette Ebrahim en Evita Bezuidenhout sal ook teenwoordig wees terwyl die jazz-ikoon Melanie Scholtz te siene sal wees in Cape Town Tango.
Besoek suidoosterfees.co.za vir meer inligting.
Lees Meer
