Dit is gebaseer op die stelling dat gereelde oefening daartoe kan bydra om die drang na nikotien te verminder terwyl dit ook ’n gesonder verstand en liggaam kondisioneer. So ook is daar verskeie ander redes waarom oefening kan help om jou rookgewoonte in die kiem te smoor. Ons vertel jou meer daarvan.
• Oefening stel endorfiene vry
Endorfiene is ’n hormoongroep wat in die brein en senustelsel afgeskei word en lei gevolglik tot gevoelens van gelukkigheid. So ook dien dié “goedvoel-hormoon” as ’n goeie onderdrukker vir die behoefte aan nikotien. Daarom is die groot aantal endorfiene wat ná fisieke oefening vrygestel word ’n effektiewe manier om die verlange na ’n sigaret te verminder.
• Oefening verbeter jou geestelike welstand
Nikotienverslawing het ’n groot geestelike komponent en dus speel die verstand ’n groot rol tydens die rehabilitasieproses. Daarom kan oefening daartoe bydra om ’n gesonde ingesteldheid te skep. So ook is dit ’n goeie wyse om alle opgeboude energie op ’n gesonde wyse vry te laat eerder as om alternatiewe verligting te soek.
• Oefening help om verveeldheid te bekamp
Dit gebeur soms dat ’n roker uit pure verveeldheid ’n sigaret sal aansteek. Oefening is egter ’n goeie alternatief hiervoor en kan, soos met rook, by die werk of by die huis geniet word. Konsentreer daarop om kort sessies te doen of loop ’n draai of twee om die kantoor wanneer jy ’n blaaskans nodig het. Nie net sal dit jou aandag van die rook aflei nie, maar dit sal jou ook daardie ekstra tikkie energie vir die res van die dag gee.
• Oefening gee jou ’n doel om na te streef
As jy jou oefensessies met ’n spesifieke doel voor oë in gedagte aanpak, kan dit jou help om die behoefte aan rook te stuit, asook om nie na ou gewoontes toe terug te keer nie. Boonop sal die positiewe veranderinge wat jou lyf ondergaan jou ook motiveer om ’n gesonder leefstyl te handhaaf.
BRON: Zone Fitness
Lees ook: Hoe rook jou vel beïnvloed
