Thaba Ya Batswana lê net suid van Johannesburg, omring deur die pragtige Klipriviersberg Natuurreservaat.
Daar is heelwat te doen – en jy sal tien teen een ’n bruidspaartjie ook daar raakloop – maar die leeuwelpies is die nuutste aanloklikheid. Sedert 1 Desember 2012 is die reservaat ook die tuiste van die Thaba Lions Educational Centre wat deur Lombardi Lions bestuur word. Besoekers kan die sentrum binnegaan en met die fraaie welpies speel, onder toesig van Retha Lombard. Daar is “gewone” bruin leeus sowel as skaars wittes. Die welpies word by die sentrum aangehou tot hulle twaalf weke oud is, en dan . Dis ’n besondere geleentheid om hulle van so naby te ervaar!
Wanneer die gesin lekker met die welpies gespeel het, kan julle ’n heerlike middagete by die Kraal Kombuis-restaurant geniet, of by die Olive Tree Coffee Shop uitspan. Jy kan ’n bietjie rus terwyl die kinders in die speelarea in die tuin langs die restaurant rondhardloop.
Jy sal natuurlik ook jou oorsese besoekers se harte steel as jy hulle hier ’n tikkie Afrika laat ervaar!
Toegang tot die Thaba Lions Educational Centre kos R70 per persoon.
Toegangstye: Maandae tot Vrydae van 09.00 tot 11.00 en 14.00 tot 17.00; naweke en openbare vakansiedae van 09.00 tot 15.00.
Meer inligting by 011 959 0777
