Skuinskoek

Genoeg vir 8

Dié lekkernye is heerlik wanneer hulle warm uit die olie met dubbeldikroom en regte moskonfyt voorgesit word.

• 625 ml (2½ k) koekmeel
• 125 ml (½ k) suiker
• knypie sout
• 8 ml (½ e) fyn kaneel
• 8 ml (½ e) kremetart
• 20 ml (1 e + 1 t) botter
• 45 ml (3 e) melk
• 45 ml (3 e) water
• 5 ml (1 t) koeksoda
• 2 eiers, geklits
• olie

Kaneelsuiker

• 80 ml (1⁄3 k) fyn kaneel
• 80 ml (1⁄3 k) strooisuiker

1. Sif die koekmeel, suiker, sout, kaneel en kremetart saam.
2. Vryf die botter met die vingerpunte by die meelmengsel in.
3. Meng die melk, water en koeksoda. Gooi eers net die helfte van die melkmengsel by die eiers en meng. Gooi die eiermengsel by die meel en meng. Die deeg moet sag maar nie slap wees nie. Voeg die res van die vloeistof indien nodig bietjie vir bietjie by tot die meel nat en die deeg kniebaar is.
4. Knie die deeg op ’n meelbestrooide werkvlak tot glad en elasties.
5. Trek ’n stuk van die deeg af en rol tot dit soos ’n dik boerewors lyk. Druk eweredig plat met die palm van die hand totdat dit 1½ tot 2 cm dik is.
6. Sny in skuins stroke van sowat 5 cm breed.
7. Bak in warm, diep olie oor matige tot lae hitte. Toets eers die hitte met ’n stukkie deeg – die olie moenie te warm wees nie sodat die koekies kan rys en nie te donker braai nie.
8. Skep met ’n gaatjieslepel uit en dreineer op kombuispapier.
9. Kaneelsuiker: Meng die kaneel en suiker. Rol die warm skuinskoekies in die kaneelsuiker en sit voor met dubbeldikroom en moskonfyt.