Sien Edoardo Villa se beeldhouwerk in Johannesburg

Sien Edoardo Villa se beeldhouwerk in Johannesburg. Inligting en foto’s verskaf. Hooffoto is van Villa se Vertical Forms, 1958

Jy het nog tot einde April kans om ’n draai te maak by Vertical Presence: The Sculpture of Edoardo Villa by die Atrium, Trumpet-gebou, Keyes-kunsmyl in Rosebank, Johannesburg.

Die publiek kry selde kans om die werk van ’n kunstenaar van Edoardo Villa (1915–2011) se statuur te sien. Die uitstalling, Vertical Presence, is ’n viering van die ruimtelike benutting, fisieke grootsheid en sintuiglikheid van sy werk.

Sien Edoardo Villa se beeldhouwerk in Johannesburg

Abstract Forms, 1965

Die beelde word in The Atrium gehuisves en vloei oor na True Design en in Keyes-weg sodat verbygangers dit ook kan geniet.

Villa het in die veertigs as krygsgevangene na Suid-Afrika gekom en na die Tweede Wêreldoorlog hier aangebly.

Hy het in onderhoude verwys na die geleenthede en ruimte vir die jeug in Suid-Afrika teenoor die geslote kontinentale lewe in Europa. Hier kon hy nuwe moontlikhede ontgin.

Van sy vroeë werke soos Seated Figure (1953) en Vertical Form (1958) sal te sien wees. Hy was sedert die 60’s deel van die Amadlosi-groep saam met onder andere Sydney Kumalo, Cecily Sash en Cecil Skotnes. “Amadlosi” beteken die gees van die voorvaders. Die invloed van Afrika was duidelik in sy werke soos Heraldic Figure (1963), Masai Girl (1963) en Head (1964) te sien. In die sewentigs het hy op grootskaal met staal gewerk en sy beeldhouwerk, Tree (1977), is ’n goeie voorbeeld. Van sy ander imponerende werke sluit in, War Figure (1980) en The Conversation (1980).