Die briljante vertolkings van die talentvolle jong akteurs blaas sommer nuwe lewe in die storie. “Die proses om die rolle toe te ken, was redelik omvattend en meer as 400 kinders het vir oudisies opgedaag,” het die regisseur, Morné du Toit, gesê.
“Ons het gelukkig drie lewenslustige tjokkertjies gekry wat regtig kleur aan die storie verleen het. Jaden van der Merwe het eerste ’n rol losgeslaan en het hoë standaarde vir die ander gestel. En toe ons die klompie die eerste keer tydens repetisies gesien het, het ons geweet dat ons die spyker op die kop geslaan het, want saam verleen hulle soveel volwassenheid aan die karakters wat hulle speel. In ’n ommeswaai van die tradisionele rolle, is dit hulle wat die volwassenes leer en help met hul transformasie.”
Die dertienjarige Hoender is ’n wiskunde-genie en suksesvolle hoenderboer wat sakgeld verdien deur hoendereiers te verkoop. Sy ma het op die dag van haar man se dood ‘ophou lewe’ en is glad nie meer betrokke by haar kinders se lewens nie.
Wanneer Drikus by die buurhuis intrek, word hy en Hoender vinnig vriende en Hoender ontdek dat die nuwe buurseun Hodgkin se Siekte het. Drikus noem aan Hoender dat dit sy laaste wens is om ’n zombie-fliek te maak. Die bende se derde lid is Chris, Hoender se droommeisie. Die drietal vorm vinnig ’n onbreekbare band en ontvlug saam van hulle eentonige daaglikse bestaan.
Drikus se deursettingsvermoë en genadelose vasberadenheid om lewe in die gevrekte gemeenskap waarin die driemanskap woon te blaas, gee hulle ’n nuwe doel voor oë.
Die rolprent is deur Redhead Productions en Faith in Motion Productions, in samewerking met kykNET Films, die ATKV en die Departement van Handel en Nywerheid, vervaardig. Dit word in Suid-Afrika deur Indigenous Film Distribution versprei en sal op 7 Julie landwyd in teaters uitgereik word.
Kyk na die lokprent hier:
