Vertel ons meer oor “Sing my Hart Uit”
Sjoe, sing my hart uit is ’n album waaraan ek al twee en ’n half jaar werk (as dit nie al langer is nie). Ek wou nog altyd ’n album uitbring, maar ek wou dit reg doen. Ek wou deel wees van die skryf en samestelling van die album, terwyl ek ’n stukkie van my hart daarin sit. Ek het saam met ’n wonderlike skryfspan vanuit die Kaap gewerk en ons het dit reggekry om ’n droom-album uit te bring.
Wat is jou gunstelingsnit op die album?
Die naam sê dit alles: “Lekker lyf lekker”.
Wat beteken hierdie album vir jou?
Dit is ’n deel van my hart wat ek aan diegene gee wat gewillig is om te luister.
Kan ons enige musiekvideo’s verwag?
Ja, daar is ’n video vir “Asmeloos” en “Droë Riviere”.
Kyk die video vir “Droë Riviere” hier:
Gaan jy met hierdie album toer?
Dit is beslis die plan, maar ek wil dit eers teen die einde van die jaar doen. Dan is dit soos ’n “working holiday.”
Wat was die grootste uitdaging wat jy met die maak van die album ervaar het?
Om die liedjies te skryf was vir my baie moeilik, want dit is iets wat ek nog nooit vantevore gedoen het nie. Gelukkig, nou dat ek saam met ’n wonderlike span skryf, weet ek dit is iets wat ek vir ’n lang tyd sal wil doen.
Wat beteken dit vir jou om jou hart uit te sing?
Wel, vir my is dit om alles te gee wanneer ek voor die mense staan wat daar is om my te sien. En dan natuurlik, om my hart vir hulle in die vorm van my album te gee.
Wat hou die res van 2017 vir jou in?
Ek hoop dat dit net sukses sal inhou met baie optredes waar ek my hart uit kan sing.
