Deur Maryke Roberts. Foto’s: Clifford Roberts
Dis slegs die derde keer dat hierdie Cap Classique gemaak is, omdat dit net in uitsonderlike oesjare gemaak word. Daar was vrystellings in 2013 en 2015.
Die geleentheid is onder die druiweprieel op die stoep van die historiese herehuis gehou.
Spier, wat uit 1692 dateer, is een van Suid-Afrika se oudste en bekendste wynplase in familiebesit. Die span se toewyding aan kwaliteit-wyne, het hulle twee keer – in 2011 en 2018 – die gesogte erkenning as Suid-Afrikaanse Produsent van die Jaar deur die Internasionale Wyn- en Spirituskompetisie (IWSC) besorg.
Die druiwe vir die 2016 Prestige Cuvée, wat ook slegs uit uitstaande blokke afkomstig is, is tydens een van die ergste droogtes in die Wes-Kaap geoes. Alhoewel die watertafel laag was, was die druifkwaliteit uitsonderlik. Die Chardonnay- en Pinot Noir-druiwe het ongeëwenaarde konsentrasie en kompleksiteit bereik as gevolg van die droë weer en matige temperature.
Dis met die hand gepluk en gesorteer en die trosse heel gepars. Die vryloopsap van elke variëteit is afsonderlik in vlekvrye staaltenks en 10% in 400L Franse eikehoutvate gefermenteer. Sekondêre fermentasie en rypwording het agt jaar op die gismoer geduur, het Heidi Dietstein, Spier Cap Classique wynmaker gesê.
Sy het voorts vertel dis ’n droom wat gewaar geword het vir haar. Die 2016-oesjaar was baie goed en sy het die Chardonnay vir varsheid en die Pinot Noir vir vrug-aromas versny. “Ons het net die sagste sap gebruik en dis met groot sorg hanteer om die druiwe se essensie te behou.”
“Ons wag al agt jaar hiervoor,” het Johan Jordaan, Spier se keldermeester, tydens die geleentheid vertel. “Maar laat ek jou sê, daardie agt jaar was elke sekonde werd. Die cuvée se langdurige kontak met die moer het dit met ‘n buitengewone diepte van karakter en ’n kompleksiteit wat net tyd kan gee, besorg.”
Die Prestige Cuvée vertoon Spier se breë spektrum wynmaak-vaardighede. “In ’n era waar kitsbevrediging koning is, nooi hierdie Cap Classique jou om stadiger te ry en die oomblik te geniet. Dit gaan nie net oor wanneer jy dit drink nie, maar nog belangriker, die geselskap waarin jy jouself omring en die kwaliteit van die tydjie, wat jy geniet. As jy my vra, is dit die perfekte pasmaat,” sê Johan.
Hy het voorts aan gaste vertel dat die bekendstelling ’n ware outydse fees is met kaas en wyn en mosbolletjies wat die Franse Hugenote ingebring. “Ons gebruik mos gedeeltelik gegiste druiwesap hiervoor en dis deur die span by VADAS op die plaas gebak.”
Die ou gebou neffens die herehuis was die plaas se eerste gebou en dateer uit 1776 en was altyd die wynkelder. “Jy kan dit steeds gebruik as jy ’n garageist is, maar ons is so bietjie daar verby,” het hy met ’n knipoog gesê.
Heidi en Johan het vertel dis die vroegste ooit oes op Spier vanjaar en teen die tweede week van Februarie is meer as die helfte van die oes afgehandel en dis “ongelooflik”. Heidi het bygevoeg dat hierdie ’n oes is om mee rekening te hou. “Dis ’n oesjaar vir stewels in die wingerde; nie stewels in die kelder nie. Die druiwe moet geproe word, jy kan nie net op lesings en tellings gaan nie.”
• As Spier se top Cap Classique, word die Prestige Cuvée in beperkte hoeveelhede vervaardig. As jy nuuskierig is om hierdie raar borrels te proe, kan jy die Prestige Cuvée Oesproe bespreek, tans beskikbaar is by die proelokaal tot einde Februarie. Die proe word met ’n glas van die Cuvée en varsgebakte VADAS mosbolletjies – wat met druiwemos van vanjaar se oes gefermenteer is – aangebied.
Bespreek jou plek vir R110 per persoon: https://www.spier.co.za/visit/wine-tasting
