Ek moet erken, ek het ook gefrons oor die idee. Stefen Chow, ’n professionele fotograaf van Beijing, het op ’n dag besef sy tweejarige dogtertjie, Chow, neem die wêreld al wakkerder waar. Hy het agt dae oop gehad en haar op ’n mini-avontuur na Taiwan geneem terwyl haar mamma moes werk.
Die twee het saam met babadiertjies op ’n plaas uitgehang, agter treine aangejaag, en saam teen ’n storm geskuil.
“Ons vriende het gesê sy is gans te jonk en het haar mamma nodig, maar soms moet jy op ’n verantwoordelike wyse ’n risiko neem om interessante ervarings te hê.”
Stefen moes doeke omruil en saans vir Chow aan die slaap sus, “maar uiteindelik was ek ’n ‘regte’ ouer en nie meer haar tweede keuse nie! Vroue is bevoorreg om nege maande se swangerskap te ervaar. Ek kon so ’n bietjie inhaal. Ek het ook baie gou agtergekom watter veeleisende taak ma’s het. En ek het my dogtertjie fyner leer ken.”
Die twee het met ’n fiets langs die ooskus van Taiwan gery, “saam met babadiertjies op ’n plaas uitgehang, op vissersbote gery, agter treine aangejaag, heuwels geklim en saam teen ’n storm geskuil. En ons het meer gegiggel as tantrums gegooi.
“Die ervaring het ons nader aan mekaar gebring. En die beste is – Chow se mamma stem saam!”
Meer inligting en foto’s by www.medium.com en stefenchow.com
Lees Meer
