Model-ma en dogter verskyn in nuwe Burberry-veldtog

Model-ma en dogter verskyn in nuwe Burberry-veldtog. Deur Bea Lingenfelder en Susra Matthee. Hooffoto:  Greatstock  / Shutterstock

Naomi Campbell het van sy twaalf was by haar ma geleer hoe om op die loopplank te loop. Sy het aan The Guardian vertel hoe hulle twee in hul huis se gange op en af geloop het terwyl Lionel Richie se musiek op die agtergrond speel.

Naomi neem haar ma gereeld as haar metgesel saam na spoggeleenthede. Verlede Desember het Naomi en Valerie albei in swart uitrustings geskitter. Die swart fluweel van Naomi se Versace-rok bring die gebruik van tekstuur na vore en sy hou haar bykomstighede min. Aan haar sy pronk moederhen met ’n klassieke swart snyerspak en ’n kenmerkende Bulgari- nekstuk wat die kollig steel. Mode is vanselfsprekend belangrik in die twee modelle se lewe, en keer op keer bewys die Campbells dat hulle vir die modewêreld uitgeknip is.

Hoewel Valerie nie ’n dag ouer as haar dogter lyk nie, kies sy tog ’n styl wat by haar ouderdom pas. Sy is dikwels te sien in vleiende, vroulike snitte eerder as gewaagde ontwerpe. Haar rokke word slim in diagonale lyne versier wat haar ’n uurglasfiguur gee. Sy hou ook van die klassieke en statige soldatejas. Haar kleurskema is meestal donker en haar bykomstighede is minimalisties.

Hulle verskyn nie net sy aan sy op die rooi tapyt nie, maar op die loopplanke ook. In 1993 het Valerie en Naomi op die Mugler-vertoning in monochroom nommertjies die loopplanke oorheers.

’n Klompie jare later, in 2010, lyk hulle nog net so beeldskoon soos toe hulle vir die Fashion for Relief-liefdadigheidsorganisasie verskyn het.