Demi-Leigh Nel-Peters, Mej. Heelal 2017, keer eersdaags terug na Suid-Afrika vir amptelike feesvieringe rakende dié titel. Sy sal op 24 Januarie 2018 vir die eerste keer in SA wees sedert sy op 26 November 2017 in Las Vegas, Nevada as Mej. Heelal gekroon is.
Lees ook meer oor Demi-Leigh se groot oomblik hier
Demi-Leigh het haar stempel in die geskiedenisboeke afgedruk toe sy die tweede Suid-Afrikaner geword het om hierdie gesogte titel te verower. Die eerste Suid-Afrikaner wat hierdie kroon gedra het, was rooi rose se eie Hollywood-korrespondent Margaret Gardiner wat in 1978 gewen het.
Kyk hier na die video’s van die oomblikke waarin Demi-Leigh en Margaret gekroon is
Lees ons “Margaret uit Hollywood“-artikels hier.
As die 66ste Mej. Heelal-wenner sal Demi-Leigh op ’n week lange feesvieringstoer deur Suid-Afrika reis waar sy onder meer Johannesburg, Kaapstad, en haar tuisdorp Sedgefield sal besoek.
As deel van haar Mej.Heelal-werk, sal Demi-Leigh fokus op die bemagtiging van vroue regoor die wêreld met haar Unbreakable-veldtog. Hierdie is ’n inisiatief wat sy voorheen reeds in SA geskep het waar sy met selfverdedigingskenners saamgespan het om vroue op te lei, in te lig en te bemagtig oor hoe om moeilike situasies te hanteer, onder meer verskeie vorms van aanranding, toksiese verhoudings en seksuele teistering.
Tydens haar SA-toer sal sy Unbreakable-werkswinkels aanbied in beide Soweto en Kaapstad. Sy sal ook weer by die slagoffers van die Knysna-brande uitkom wat ook ontvangers was van die fondse wat sy in 2017 ingesamel het.
Lees ook: Knysna, hoe sê ’n mens dankie?
Lees ook meer oor Demi-Leigh se Unbreakable-veldtog
Demi-Leigh sê sy is baie opgewonde om huis toe te kom: “Ek kan nie begin om my dankbaarheid en trots uit te druk dat ek ons land as Mej. Heelal kan verteenwoordig nie. Om ’n globale ambassadeur te wees, is so veel ’n verantwoordelikheid as wat dit ’n eer is. Ons nasie is ’n samestelling van baie verskillende agtergronde en kulture – een van baie redes waarom ek trots is om ’n Suid-Afrikaner te wees. Ek is baie opgewonde om hierdie prestasie te vier met my mense in die egte Mzansi-gees.”
Haar warrelwindtoer sluit in amptelike verwelkomingseremonies by beide die OR Tambo-lughawe en Kaapstad Internasionaal; ’n straatparade in Sedgefield; ’n byeenkoms by Suid-Afrika se mees glansryke perdewedren, die Sun Met; sowel as om bekendes en vorige Mej. Suid-Afrika-titeldraers by Cell C se hoofkantore te ontmoet.
