Die Mej. Heelal-organisasie het Sondag aangekondig dat voormalige Mej. Heelal, Margaret Gardiner, as een van die beoordelaars by die komende Mej. Heelal-kompetisie sal dien, wat op 16 November by die bekende Arena Ciudad in Mexiko plaasvind.
Margaret het haar opgewondenheid uitgespreek en gesê: “Dit is ‘n groot eer om terug te keer na die land waar ek gekroon is om die lewe van ‘n jong vrou te bemagtig en te verander. Dankie aan die Mej Heelal-organisasie wat my toevertrou om deel van die keurkomitee te wees.”
Foto: Verskaf/ Willem Botha
In ‘n boodskap wat op sosiale media gedeel is, het die Mej. Heelal-kompetisie, met ‘n geskiedenis wat oor ‘n halwe eeu strek, vir Gardiner geprys en gesê: “Haar elegansie, ervaring en kennis in die vermaaklikheids- en skoonheidsbedryf maak haar ‘n ikoniese en gerespekteerde figuur in die wêreld van internasionale skoonheid. Haar nalatenskap inspireer ’n nuwe generasie vroue.”
Met meer as vier dekades se ondervinding in die kollig, is Gardiner nie net ‘n voormalige Mej. Heelal nie, maar ook ‘n gerespekteerde joernalis en voorstander van vroueregte en sosiale geregtigheid. Haar komende boek, Damaged Beauty: Joey Superstar, wat vroeg in 2025 vrygestel word, verken die verborge stryd wat vroue in die gesig staar.
Lees ook: FOTO’S: Hoe rooier, hoe mooier! Mia vertrek na Mexiko vir Mej. Heelal
