Los matte

– Deur Cornel Dunn. Hooffoto: Pixabay

Kleur

Jou keuse van kleur is die beginpunt. As jy alreeds heelwat kleur en patrone in jou vertrek het, moet jy verkieslik ’n effekleurige mat kies wat een van jou bestaande kleure komplimenteer of alternatiewelik natuurlik gaan. As jy ’n bont mat verkies, is dit beter om die mat eerste aan te skaf en die meubels daarna.

’n Mat is dikwels die grootste item in jou vertrek. Neem dus jou vloerbedekking en muur se kleur in ag. Moet egter nie té veilig speel nie, ’n helder mat kan ’n vertrek ’n groot hupstoot gee.

Tekstuur

Daar word dikwels nie gelet op die tekstuur van die mat en die invloed daarvan op die vertrek nie. ’n Vertrek met baie tekstuur en verskillende lae skep ’n ryk en warm gevoel. Daar is soveel meer beskikbaar as wol en sisal.

Kombineer jou bestaande meubels met ’n kontrasterende tekstuur. Kombineer fluweel met ’n grasmat of ’n leerbank met ’n mat met ’n lang pluis. Wees ook prakties. Indien ouer mense die mat sal gebruik, kan ’n lang pluis hul stapvermoë belemmer.

Grootte

Hier moet jy jou eie oordeel gebruik. ’n Los mat moet jou hele sit-area akkommodeer, nie noodwendig die hele vertrek nie. Ten minste die voorpote van jou banke en stoele moet op die mat staan. In die eetkamer moet die mat onder die tafel groot genoeg wees om ook die stoele the akkommodeer.

Neem ook die vorm van jou vertrek in ag. ’n Vierkantige vertrek werk beter met ’n vierkantige of ronde mat. Dieselfde geld vir ’n langwerpige vertrek.