Lekker uitstappie vir die hele gesin – en heerlike burgers daarby!

Deur Maryke Roberts. Foto’s: verskaf

Die plaas se eerste fotografiekompetisie het meer as 500 inskrywings gelok, en die wen-inskrywings is nog tot einde Junie in die wynlandgoed se biblioteek te sien.

Finaliste se foto’s van die eerste fotografiekompetisie word in die Vergelegen-biblioteek uitgestal en is tot einde Junie vir die publiek toeganklik.

Die foto’s is uiteenlopend en belig die vele kenmerke van hierdie pragtige landgoed, wat vier jaar gelede tot provinsiale erfenisterrein verklaar is.

Die wenners sluit onder meer in: Kameraklaswenner: ’n Bloukraanvoël beeldhouwerk in die Oostuin, deur Mike Hodgson; Slimfoonklas eerste plek: ’n Sonneblomland teen ’n bergagtergrond, deur Navashni Knowlden; Junior klaswenner: Vergelegen se historiese Octagonal Garden, deur Morgan Eaton; People’s choice-toekenning: Vergelegen-besoekers met wyn, deur Thomas Moss.

“Ons is verheug oor die reaksie en baie dankbaar teenoor ons vennoot en borg Orms-fotowinkel,” vertel Wayne Coetzer, Vergelegen se besturende direkteur. “Orms het ’n streng beoordelingsproses bestuur en ook eersteklas afdrukke gelewer.

“Dit was fassinerend om die landgoed deur die vars perspektief van hierdie amateur- en professionele fotograwe te sien. Hulle het daarin geslaag om die skoonheid en uiteenlopende besienswaardighede van hierdie wonderlike eiendom vas te vang.”

Met al die mooiheid om jou, kan jy natuurlik nie help om honger en dors te word nie. Hoewel daar verskeie lekkerbek-plekke op die plaas is om aan wen-wyne te teug en uithalerkos te geniet, is die nuutste avontuur wat jy nie kan misloop nie, die Nguni Café.

Teen die skouspelagtige agtergrond van die Hottentots Holland-bergreeks, is hierdie opskiet-restaurant binne ’n 400-hektaar veld geïnstalleer. Gaste kan die landgoed se manjifieke Nguni-trop besigtig, wat sowat 400 inheemse beeste insluit, wat vrylik wei op die groen weivelde langs die opskiet-restaurant.

Die glaskonservatorium is omring met hooibale, en dis ingerig om die Nguni-tema te versterk. Dit is ’n verwelkomende mengsel van plattelandse sjarme en moderne flair.”

Hierdie lekkerte is egter net vir twee maande beskikbaar en beklemtoon kwaliteit bestanddele en uitstekende diens en die beste hamburgers in die dorp!

Jy kan jou tande sink in sappige beesvleis-, hoender- of vegetariese burgers met skyfies (R120). Nagereg is ’n draairoomys (R30) of alternatiewelik roomys met ’n sjokoladebruintjie (R60). Kinders van 10 jaar en jonger kan ’n kinderburger en skyfies teen R80 geniet.

Bier, wyn, koeldrank en warm drankies is beskikbaar.

Wayne vertel oor ’n lekker dubbel kaasburger en skyfies: “Vergelegen het in Julie 2021 met ’n prettige idee vorendag gekom, met sy eerste Nguni Café, ‘n fynproewers worsbroodjiekafee in die skilderagtige omgewing van sy beeskraal. Hierdie opskiet – wat tydens die Covid-19 pandemie-inperking bekendgestel is toe gasvryheidsinstansies weer gaste kon verwelkom en wynverbruik op die perseel kon bied – het baie vinnig gewild geword. Die huidige Nguni Café bou voort op hierdie aanvanklike sukses.”

Terwyl die Nguni rooiwyn sysag in my keel afgly, kom snuffel ’n mooie Nguni naby ons tafel agter die glas en ek gaan leun oor om haar kop te vryf.

Vergelegen is daagliks oop vir die publiek, 08h30-17h00 (laaste toegang 16h00) en die Nguni Café Woensdag tot Sondag van 10:00 tot 16:00. Geen besprekings word geneem nie. Binne kan 30 mense sit en die bedekte stoepgedeelte het plek vir 70 mense.

Lees ook: St. Helena se toerismehekke is wawyd oop