Julie: Doen dit in die tuin
Hooffoto: Julie Gustavo Fring vir Pexels
1. Snoei rose teen einde Julie of begin Augustus en behandel die oop lote om dit teen insekte en fungus te beskerm. Gee die plante roosvoeding, vul die deklaag om die plante aan en gee dit weekliks soggens water.
2. Beskerm tenger plante teen ryp.
3. Maak die tuin vroegoggend nat om die grond kans te gee om uit te droog voor dit donker en koud word.
4. Plant winterblomme vir kleur. Pluk gereeld van die blomme en knyp die dooie blomme af sodat dit langer blom.
5. Maak winter- en lentebolle gereeld nat.
6. Trek bossies uit.
7. Doen nou dinge waarvoor jy nie altyd tyd het nie, soos om jou tuingereedskap reg en skerp te maak, paadjies uit te lê of ’n spesiale hoekie in te rig.
Blom van die maand
Julie het twee blomme, naamlik die ridderspoor en die waterlelie.
Ridderspoor
Die ridderspoor is in verskeie ryk kleure te kry. Pienk ridderspore simboliseer wispelturigheid en wit verteenwoordig geluk, maar oor die algemeen beteken ridderspore positiwiteit en liefde.
Volgens die Griekse mitologie het dit geblom waar Ajax se bloed gevloei het tydens die Trojaanse oorlog.
Die ridderspoor hou glo slange weg en help teen skerpioensteke. In Engeland het mense die blomme in hul badwater gegooi om hulle teen spoke en towery te beskerm. Inheemse Amerikaners gebruik die blomme vir kleurstof.
Waterlelie
Die waterlelie simboliseer reinheid en wedergeboorte. Die blomme hou net ’n paar dae voor hulle onder die water verdwyn, wat dit nog spesialer maak.
Foto: Diego Madrigal vir Pexels
Hooffoto: Julie Gustavo Fring vir Pexels
Lees ook: Maak self kweekglasies om plante uit te stal of as geskenke
