In die tweede episode van hierdie gewilde koswerklikheidsreeks op kykNET moes die spanne vir die eerste keer saamwerk om een dis aan stersjef Bertus Basson en koskenner Kobus Botha voorsit.
Dit is ook die eerste episode waartydens een span as wenner aangekondig is en ’n ander span hul voorskote moes ophang.
Die uitdaging
Sout en peper is die spil waarom alles draai – en veral hoe sout ingespan word om kos te bewaar, soos byvoorbeeld biltong en bokkoms. Appelkose word mebos met ’n soet of ’n sout smakie. En peper maak jou smaak lekker wakker!
Die uitdaging vir hierdie episode is ’n braaigereg wat sout, peper, asyn en koljander vereer. Bertus wil tegnieke soos kuur of pekel sien in die disse wat voorberei word en elke dis moet minstens een van die tradisionele Suid-Afrikaanse gesoute produkte bevat. Die deelnemers is 90 minute gegun om hul dis op die vuur voor te berei.
Dit was ’n tweede wen vir Mike van Rooyen (37), ’n kinkelbraaier van Morningside, Johannesburg en ’n eerste vir sy spanmaat, Suzie Wandrag, (47), ’n beïnvloeder en inhoudskepper van die Strand.
’n Paar vrae aan Mike
Jou tweede wen in ’n ry! Het jy dit verwag?
Ek het dit glad nie verwag nie. Ek het al voorheen met mebos gewerk en dit is ’n wonderlike plaaslike produk. Dit was ’n baie lekker uitdaging.
Ek was werklik opgewonde en het baie van die dis gehou wat ons voorgesit het. Ek verkies eenvoudige en minimale borde kos met baie geur – en dit is presies wat ons voorgesit het.
Was dit vir jou moeilik om ’n ritme met Suzie te vind?
Ek en Suzie het lekker saam gewerk. Dit was die eerste uitdaging waar ons saam een dis moes voorberei en dit het tyd gevat om mekaar se sterk punte te leer ken.
Die doel is altyd om die beste uit jou spanmaat te kry. Daarom is waarneming so belangrik want ek weet Suzie kán braai. Die lamsribbetjie was in goeie hande met haar. Ek dink mense gaan altyd ’n bietjie koppe stamp aan die begin. Dit is normaal en daarna kan die spanwerk net verbeter.
Waar het jy aan die idee van mebos-ketchup gekom? Was hierdie ’n eerste vir jou?
Ek het voorheen ’n weegbree-ketchup (weegbree is plantain) gedoen en die geur daarvan was iets heeltemal nuut vir my. Ek het dieselfde resep as vir die wegbree gebruik, maar die keer net die mebos bygesit. Dit was beslis ’n eerste vir my.
Ek glo die beste idees is in the moment en dis presies wat die mebos-ketchup was!
Jy hou daarvan dat mense op hul voete kan dink. Hoe hanteer jy dit as dit nie gebeur nie?
Dit is altyd ’n beter idee wanneer twee mense idees uitruil en tot ’n ooreenkoms kan kom. Vir twee mense om dieselfde visie te hê, is bykans onmoontlik. Dit hou ’n risiko in vir ons altwee maar die vertroue kom in wanneer daar ’n wen is.
Ek streef daarna om kalm te bly maar dinge gebeur in the heat of the moment in die kombuis wat nie persoonlik opgevat moet word nie.
Was dit vir jou vreemd toe Stefan jou gevra het om sy mebos-blatjang te proe?
Glad nie. Dit was vir my wonderlik om raad te gee waar ek kan. Ek glo altyd daaraan om nie dinge geheim te hou nie en om ander mense te help waar ek kan. Ek doen dit met die grootste graagte.
’n Paar vrae aan Suzie (Suzette)
Jy het vantevore gesê braai is nie net ’n sport vir mans nie. Hoe het dit vir jou gevoel om langs Mike te braai?
Mike is ’n baie goeie sjef. Ek dink ons het baie by mekaar geleer en ek het my eie persoonlikheid ingebring met ons wen. So, dit bly maar ’n spanpoging met enige uitdaging wat Kokkedoor Vuur & Vlam ons bied. Ek dink na hierdie episode sal almal sien dat ons vroue nie onderskat moet word nie.
Hoe hanteer jy stres wanneer daar ’n kort spertyd gestel word?
Ek werk eintlik beter onder stres. Om die een of ander rede verkies ek dit eintlik want dan vat ek raak. Dit mag dalk nie altyd so lyk nie. Dis net altyd vir my moeilik wanneer ek nie net myself het om oor te worry nie.
Is jy ’n streng navolger van resepte of gebruik jy jou intuïsie rondom geur, kleur en smaak?
Ek is beslis iemand wat veel eerder my eie kop volg wanneer dit by resepte kom. As jy net ’n resep volg is daar baie min spasie om kreatief te wees en om kreatief met kos te wees is juis my sterk punt.
Jy was vasbeslote om te wen, maar wat het deur jou kop gegaan toe jy die resultate hoor?
In die eerste ronde het ons almal nog probeer om ons ritme te kry en om as ’n span saam te werk. In die tweede ronde was ek reg, gefokus en baie gemaklik voor die vuur.
Hantie Jansen (44), eienares van ’n spysenieringsonderneming in Windhoek, en haar spanmaat, Liz (Elizma) Nass (44), ’n entrepreneur van Pretoria, was die eerste twee deelnemers wie se kole in hul soeke na die gesogte kroon as Kokkedoor Vuur & Vlam-kampioene geblus is.
Kokkedoor Vuur & Vlam word Donderdagaande om 20:00 op kykNET (DStv-kanaal 144 en DStv Stream) uitgesaai. Episodes sal ná uitsending ook op Catch Up beskikbaar wees. Kyk ook solank die eerste seisoen op Showmax.
Lees ook: Afrikaanse reeks Tuiskoms binnekort op Netflix – met Michelle Botes in haar laaste rol
