Kleurregstellende verbloemers word gewoontlik onder die oogarea, om jou neus en oë gebruik. Dit stel donker skaduwees, geel en rooiheid op die vel reg. As jy die regte skakering aanwend, kan jy die perfekte voorkoms skep met jou grimering.
Kleure wat oorkant mekaar staan op die kleurwiel, kanselleer mekaar gewoontlik uit. Dit wil sê, ’n groen kleurregstellende verbloemers sal rooiheid verbloem, pers sal geel kolle verduister en oranje sal sorg dat blou kringe verdwyn. As jy hierdie teorie toepas, kan jy jou grimeerroetine baie maklik maak.
Groen
Groen staan oorkant rooi op die die kleurwiel, so dit beteken dat groen perfek is om enige rooi merke op jou gesig te verbloem, soos puisies, aknee of littekens. As jy met Rosacea sukkel, sal ’n groen voorbereidingslagie ook help om die ongewensde rooiheid op jou vel weg te steek en jou die perfekte eweredigheid gee vir die voorbereiding van jou onderlaag.
Oranje
Oranje is perfek vir diegene wat sukkel met donker kringe onder die oë, aangesien oranje oorkant blou lê op die kleurwiel. Indien jy ’n ligter vel het, moet jy oranje vermy en eerder ’n ligte verbloemer met ’n appelkoos-skakering gebruik.
Pienk
’n Pienk kleurregstellende verbloemer is gewoonlik meer van ’n salm kleur en word gemaak deur rooi, oranje en geel te meng. Gelukkig is daar reeds ’n paar pienk verbloemers op die mark. Pienk word gebruik om donker kringe op ligter velle te verbloem.
Pers
Pers is die beste vir die bekamping van geel ondertone op die vel. Gebruik ’n pers voorbereidingslagie om geel merkies op jou vel te verwyder, asook om jou vel effens kleur te gee as jou vel baie vaal lyk.
Geel
Geel kleurregstellende verbloemers word gebruik om enige letsels wat ’n pers kleur het te verbloem, byvoorbeeld: are, kringe onder die oë en kneusplekke.
#rooirosewenk
- Wend ’n dun lagie verbloemer aan, anders gaan die kleur deur jou onderlaag wys.
- Moet dit nie oordoen nie, gebruik slegs kleurregstellende verbloemers indien jy letsels, merkies en kringe wil verduister. Moenie kleure gebruik wat jy nie nodig het nie. Gebruik dit slegs wanneer die merkies duidelik sigbaar is.
- Gebruik ’n grimeersponsie om dit mooi eweredig aan te wend.
Probeer die volgende produkte
Lees Meer
