Die Middelvlei-wynlandgoed, net buite Stellenbosch se “Kersliedjies met Sonsondergang” op Sondag 12 Desember is jou kans om die Kersgees te vang.
Kom span uit met ‘n glasie of twee van Middelvlei se wyne terwyl die kleingoed die plaasdiere leer ken, op die ruim grasperk baljaar of aan een van die prettige speletjies deelneem. As die weer saamspeel, sal ’n asemrowende sonsondergang ’n bonus wees.
Maar wat is ’n Kersfees sonder ’n Kersvader? Kersvader sal spesiaal sy verskyning (per trekker) maak om geskenke aan die kleingoed uit te deel, en die aand sal met die sing van Kersliedjies afgesluit word.
Niemand sal honger huiswaarts keer nie, want die aand se koste van R400 per paartjie sluit ’n boerebraai- geïnspireerde tapasbord in. Soetmieliepoffertjies met ’n soetrissiesous, mini-braaibroodjies, hoendersosaties en boereworssosaties is onder meer op die spyskaart. Nagereg is opsioneel ekstra. Daar word ook vir die kleingoed voorsiening gemaak met ’n peuselboks wat boerewors, aartappelskyfies, ’n sap en lekkergoed teen R90 per kind insluit.
Voorafbespreking vir hierdie spesiale geleentheid is noodsaaklik en kan gedoen word via e-pos by [email protected].
Deur Maryke Roberts
