Genoeg vir 1 middelslagkoek
250 ml (1 k) water
125 g (¾ k) botter, in blokkies gesny
80 ml (¹⁄³ k) kakaopoeier, gesif
500 ml (2 k) koekmeel, gesif
5 ml (1 t) koeksoda
500 ml (2 k) strooisuiker
2 eiers
125 ml (½ k) karringmelk
5 ml (1 t) vanieljegeursel
Sjokoladeversiersel
360 g (1 blik) karamelkondensmelk, glad geklop
100 g (1 blok) sjokolade, ruweg gekap
1 Voorverhit die oond tot 160 °C. Voer twee ronde 18 cm-koekpanne met bakpapier uit en smeer met botter.
2 Verhit die water, botter en kakao in ’n klein kastrol oor matige hitte en roer tot dit gesmelt is.
3 Sif en meng die meel, koeksoda en suiker in ’n mengbak en voeg die bottermengsel by. Meng goed.
4 Voeg die eiers, karringmelk en vanieljegeursel by en klop om ’n gladde mengsel te vorm.
5 Gooi gelyke hoeveelhede van die beslag in die koekpanne en bak vir 35–40 min. of tot ’n toetspen skoon uitkom. Laat vir 10 min. in die koekpanne afkoel en keer dan op afkoelrakkies uit.
6 Smelt die sjokolade oor ’n dubbelkoker terwyl die koek bak. Voeg die karamelkondensmelk by en meng deeglik.
7 Versier die koeke met die sjokoladeversiersel en sit opmekaar om ’n laagkoek te vorm.
Lees Meer
