Jy kan ’n plastiekvrye badkamer skep

Jy kan ’n plastiekvrye badkamer skep deur Cornel Dunn. Hooffoto deur Pixabay.com

Bioafbreekbare plastiekvrye wattestokkies

Wattestokkies is van die toptien-rommelitems wat op ons strande rondlê en kan die seelewe benadeel. Mense is ook geneig om hierdie stokkies in die toilet af te spoel. Gebruik eerder hierdie bioafbreekbare stokkies om te verseker dat hulle nie jou omgewing benadeel nie.

Lees ook: 9 maniere om plastiekvry te lewe

Koekies seep

Bly weg van vloeibare seep, want dan vermy jy die plastiekbotteltjies en -sakkies waarin hulle voorkom. Verder bevat koekies seep nie soveel water soos vloeibare seep nie en is hulle boonop kostedoeltreffend.

#rrWenke:

Kies seep met die minimum verpakking. Gaan soek by zero waste-winkels, markte en ander winkels wat los koekies seep sal verkoop.

Gebruik natuurlike seep sonder chemiese bestanddele, dis beter vir jou vel en vir die omgewing.

Vermy seep met palmolie. Laasgenoemde is baie skadelik vir die omgewing en die diereryk.

Lees ook: 10 stappe nader aan ’n zero waste leefstyl

Plastiekvrye sjampoe en opknapper

Hierdie haarprodukte is nou in ’n koekievorm beskikbaar! Buiten die voordele vir die omgewing en die feit dat jy nie meer honderde leë plastiekbotteljies sal weggooi nie, is die meeste van hierdie produkte ook sulfaatvry, wat beter is vir jou hare.

Lees ook: Maak jou kind “groen” groot – dis makliker as wat jy dink!

Vermy plastiektandeborsels

In Amerika word jaarliks 22 000 000 kg tandeborsels weggegooi. Gebruik eerder ’n bioafbreekbare bamboes- of houttandeborsel. Omdat die haartjies steeds sinteties is, moet dit verwyder word wanneer jy die tandeborsel weggooi.