Hondeliefde

1. Jy raak meer aktief

Soms voel dit soos ’n hengse oorlas om woef vir ’n stappie om die blok te neem, tog hou dit eintlik ’n tweedelige voordeel vir beide jou en jou hond in. ’n Studie wat in Kanada geloods is, wys dat mense met honde meer geneig is om in matige fisiese aktiwiteite deel te neem as diegene wat nie honde het nie. Die studie het ook getoon dat hondeienaars ’n gemiddeld van 300 minute per week stap, waar ander mense slegs 168 minute per week stap.

2. Jou kinders se kanse om ekseem te ontwikkel is minder

’n Studie wat in 2010 geloods is, het bewys dat kinders wat vir die eerste jaar van hul lewens met ten minste een hond in die huis grootgeword het, ’n kleiner kans gehad het om die kroniese velkondisie, ekseem, te ontwikkel.

3. Soene maak jou gesond

Om jou hond te soen, betoon nie net jou liefde aan hom of haar nie, maar dit kan jou gesondheid ook ’n hupstoot gee! Dit kom van ’n studie wat deur die Universiteit van Arizona, soos berig deur die Independent, geloods is. Volgens hierdie studie kan gereelde soene tussen jou en jou hond tot ’n beter gesondheid lei. G’n wonder hondeienaars is so gelukkig nie!

4. ’n Lewendige stofsuier

Met kleingoed in die huis kan dit soms oorweldigend raak om alles skoon te hou. Met woef in die huis hoef jy egter nie oor die verlore krummel en spatsels koeldrank te bekommer nie. Wanneer daar ook al gemors word, sal daar altyd ’n honger magie wees wat dit met graagte sal oplek.

5. Daar is geen meer vervelige oomblikke of stres nie

Met ’n hond in die huis is daar altyd iets om te doen, hetsy dit ’n stappie om die blok, ’n paar gooie met die tennisbal of bloot net ’n lekker maag-vryf is, sal jy nooit verveeld wees nie. Nie net sal dit julle verhouding versterk nie, maar om tyd saam jou hond te spandeer is boonop ’n wonderlike stres verligter!