Hoenderlewertjiepasta

Instructions

1. Maak ’n groot kastrol drie kwart vol water en geur met sout. Bring tot kookpunt en skep die pasta daarin. Roer dit eenkeer tydens die kookproses om te verseker dat die pasta nie saamkoek nie. Kook vir 10-12 min. tot al dente.
2. Verhit die botter en olyfolie in ’n middelslagpan, voeg die uie en knoffel by en braai dit vir 3 min. oor matige hitte saam met die roosmaryn en brandrissie tot sag.
3. Verhoog die temperatuur en braai die lewertjies in dieselfde pan vir 2 min. voordat jy dit omdraai - die lewertjies moet eers goed bruin aan ’n kant wees voor jy dit omdraai.
4. Gooi die sjerrie en balse-miekasyn by - skud die pan ’n paar keer om al die lekker stukkies op die pan los te skud sonder om die sagte lewertjies te beskadig.
5. Dreineer die pasta - hou ’n bietjie (½ k) van die pastawater eenkant en skep die pasta by die lewertjies in die pan. Roer dit deur sodat die pasta goed met die pansouse bedek is. As die sous aan die min kant is, kan jy so ’n paar skeppies van die pastawater by die pansouse voeg.
6. Verhit die pasta en sous tot dit deurwarm is en sit voor.