Doen-dit-self: Versier ’n houer

Deur: Elandrè Swart. Hooffoto: Elandrè Swart

Jy het ’n houer wat nog werk, maar dit pas net glad nie meer by jou styl nie. Jy kry ook niks in die winkels waarvan jy hou om dit te vervang nie. Gelukkig kan jy enigiets nuut maak met plakpapier! Ons wys jou hoe.

Wat jy benodig

’n houer of skoenboks
Skêr
Plakpapier (R38, Builders Warehouse)
’n knip
’n pen of potlood

Builders Warehouse het ’n groot verskeidenheid plakpapiere wat by jou styl sal pas. Ons het besluit op plakpapier met ’n grys marmer-effek.

Stap 1

Draai die plakpapier om sodat die patroon na onder wys. Plaas die boks of houer op die plakpapier en knip die res van die rol vas om dit uit die pad te hou.

Stap 2

Meet die boks en teken dit aan op die plakpapier sodat jy die regte groottes sal uitknip. Ek het besluit om die binnekant ook uit te voer met plakpapier en om die onderkant ’n aparte stuk plakpapier te gee. Knip dan hierdie dele uit wat jy gaan gebruik.

Stap 3

Nadat jy die plakpapier uitgeknip het, trek die agterkant af en maak gereed om dit op die houer te plak. Gebruik ’n pen of ’n potlood om te vermy dat die papier oprol. Begin by ’n hoek, en plak die plakpapier stelselmatig, hoek-vir-hoek, om die houer.

Stap 4

Om die binneste deel van die houer te plak, knip die mates uit en vou dit waar dit in die hoeke geplaas sal word. Dit maak nie saak hoe netjies die papier aan die binnekant geplak word nie, want die produkte wat jy stoor sal dit wegsteek.