Die brug is amper hier!
Die tweede seisoen van Die brug begin vlak onder die wolke diep in die Outeniekwaberge, waar ‘n nuwe groep vreemdelinge op die oewer van ‘n dam bymekaarkom. Die skat waarna hulle soek, is op ‘n eiland 200 meter van die oewer af. Om die skat te kry moet hulle saam ‘n brug bou met hulle eie hande – in net 13 dae. Almal sal saam moet werk, maar aan die einde gaan net een van hulle oorstap om die skat op te eis en vir hulself te hou of met die hele groep te deel. Wie is die dapper siele wat die uitdaging gaan aandurf? En gaan die wenner hierdie keer deel of nie?
KYK: Amptelike lokprent – Die brug | Seisoen 2
’n Splinternuwe groep spelers en twee keer meer drama. Dít word alles belowe in die lokprent van die tweede seisoen van Die brug – die avontuur-realiteitsreeks wat spelers fisies en geestelik uitdaag tot een uiteindelik as die wenner aangewys word.
Die eerste seisoen was ’n treffer by kykers en is ook vir ’n internasionale Emmy-toekenning benoem, ’n reusepluimpie vir almal betrokke. In Die brug moet spelers saamwerk om ’n brug te bou om by die skat – ’n stewige R1 miljoen – uit te kom, maar dié reeks het meer kinkels as ’n bol staalwol. Nes die spelers én die kykers dink hulle weet wat kom, besluit die mense wat die toue agter die skerms trek: wag net so ’n bietjie …
Neil Sandilands is weer die verteller, maar om te weet wie die deelnemers is, gaan kykers geduldig moet wees.
Die tweede seisoen van Die brug begin op Donderdag 8 Mei om 20:00 op kykNET (DStv-kanaal 144) en sal ook op DStv Stream en Catch Up beskikbaar wees.
Lees ook: Vyf-vinnige-vrae met Nadia Beukes oor haar eerste rol as regisseur in nuwe teaterproduksie
