Dadelkoek

Bestanddele

• 250 g dadels
• 5 ml (1 t) koeksoda
• 250 ml (1 k) kookwater
• 250 ml (1 k) suiker
• 125 g botter of margarien
• 2 ekstragroot eiers, geklits
• 10 ml (2 t) bakpoeier
• 500 ml (2 k) koekmeel
• 5 ml (1 t) vanielje-ekstrak
• 200 g okkerneute (opsioneel), grof gekap

Vulsel

• 150 g dadels, fyn gekerf
• 500 ml (2 k) suiker
• 15 ml (1 e) botter
• 125 ml (½ k) water
• okkerneute, vir versiering
• verglansde vrugte, vir versiering (opsioneel, ons het die koek net liggies met versiersuiker bestuif)

Metode

Voorverhit die oond tot 180 °C.

1. Voer twee 23 cm-koekpanne met bakpapier uit.
2. Strooi die koeksoda oor die dadels, voeg die kookwater by en laat week tot sag. Maak die dadels met die agterkant van ’n vurk fyn.
3. Klits die suiker en botter saam en voeg die geklitste eiers by. Sif die bakpoeier en meel saam en voeg by die eiermengsel.
4. Voeg die dadels en vanielje by, asook die okkerneute en meng.
5. Die mengsel moet sag genoeg wees om van die lepel af te loop.
6. Skep die deeg in die bereide koekpanne en bak vir 35-40 min. of tot ’n toetspen skoon uitkom.

Vulsel

1. Kook al die bestanddele saam tot fyn en smeerbaar.
2. Laat die koek goed afkoel en smeer die vulsel tussen 2 lae van die koek, asook bo-op, indien verkies.
3. Versier met okkerneute en verglansde vrugte, of bestuif met versiersuiker soos ons.