Ciabatta-pizza

Ingredients

Gremolata word gemaak deur gelyke hoeveelhede fyn gekapte suurlemoenskil, knoffel en pietersielie te meng. Probeer ons nuwe variasie met olywe en dennepitte by. Dis heerlik op geroosterde vis, hoender en pasta. Ons het mozzarella-balletjies (bocconcini) in brandrissie-olie geweek. Dit gee die pizza sommer woema. Ek gebruik die res van die bocconcini in slaaie en die geurige olyfolie as ek vleis rooster.
1 ciabatta-brood, in die lengte oopgesny
sowat 10 kersietamaties per pizza (ons het kersietamaties aan die stingel gebruik)
olyfolie om mee te verf
’n hand vol basiliekruidblare
Maldonsout en gemaalde swartpeper
Vir die gemarineerde bocconcini
2 rooi rissies, in die lengte middeldeur gesny
180 ml (¾ k) olyfolie
300 g bocconcini (of gewone mozzarella in blokke gesny)
sout na smaak
Vir die olyf-en-dennepitgremolata
100 g gedroogde swart olywe, ontpit en gekap
50 g dennepitte, liggies gerooster
1 knoffelhuisie, gekap
gerasperde skil van ½ suurlemoen
15 ml (1 e) pietersielie, gekap

Instructions

1. Maak die Gemarineerde bocconcini: Kook die rissies en olyfolie vir 10 min. oor lae hitte. Haal af en laat afkoel.
2. Sit die bocconcini in ’n bakkie en gooi die koue olie oor, marineer vir minstens ’n uur of oornag.
3. Maak die Olyf-en-dennepitgremolata: Meng die olywe, dennepitte, knoffel, suurlemoenskil en pietersielie.
4. Verf die binnekant van die ciabatta met olyfolie. Rooster oor die kole tot goudkleurig.
5. Sit die kersietamaties op die ciabatta en rooster tot die tamaties begin oopbars. (Dit help as jy ’n ketelbraaier het en die deksel kan opsit, anders brand die broodjies dalk voor die tamaties gaar is. Indien jy nie ’n braaiketel het nie: Sprinkel olyfolie oor die tamaties en rooster hulle vir sowat 10 min. in die oond by 200 °C of tot hulle begin oopbars.)
6. Pak die bocconcini-balletjies tussen die warm tamaties. Strooi die gremolata en basieliekruidblare oor. Geur na smaak.