Boer soek ’n vrou Seisoen 12: Ontmoet die boere

Boer soek ’n vrou Seisoen 12: Ontmoet die boere inligting en foto’s verskaf deur kykNET

Boer soek ’n Vrou – ’n Dosyn seisoene van liefde

kykNET se gewilde werklikheidsreeks, Boer soek ’n Vrou, is terug op die kassie. En, ouder gewoonte gaan Boer Soek ’n Vrou kykers boei met tien boere se soektog na liefde.

Die sanger en aktrise, Leah, keer ook terug as die aanbieder van Boer Soek ’n Vrou en kykers sal van 17 Oktober 2019 oor 13 episodes uitvind vir wie van vanjaar se boere liefde bestem is.

Die ouderdomme van die twaalfde seisoen se boere wissel tussen 26 en 51, terwyl nege boere ’n vroulike pasmaat en een ’n manlike pasmaat soek. Vanjaar se oes het vyf boere van die Wes-Kaapse gelewer, twee van die Noord-Kaap, twee van die Oos-Kaap en een van Gauteng.

In die eerste episode kry Leah die kans om by elke boer te gaan inloer om meer uit te vind oor hul boerdery, hul drome en belangrikste van alles, watter eienskappe hulle in ’n metgesel en toekomstige lewensmaat soek.

Kykers sal aan die einde van die tweede episode op 24 Oktober uitvind watter vyf boere het die meeste briewe gekry en dan elk 10 pasmaats moet kies om tydens die blitsafsprake in die daaropvolgende episode te ontmoet.

Boer Soek ’n Vrou word Donderdae om 20:00 op kykNET, kanaal 144 op DStv, uitgesaai.