– Deur Mariette Snyman
Die boek
“Die oppervlak van die aarde het eens heeltemal anders gelyk: die grootste deel van die planeet is bedek deur uitgestrekte oseane, bespikkel met eilande en vroeë landmassas wat cratons genoem is.” Só begin Geological wonders of Namibia (Struik Nature, 2017, aanbevole prys R200). Gebeure wat oor miljoene jare strek, vou voor jou oop, en jy lees dat Namibië “at the heart of the action” was.
Elk van die hoofstukke handel oor ’n spesifieke gebeurtenis of proses wat uitgeloop het op die betrokke landskap of formasie. Die hoofstukke is in chronologiese volgorde, en die verhaal begin 13.8 biljoen jaar gelede.
Die skrywers
Die Franse paartjie Anne-Marie en Michel Detay leef deels in die suide van Frankryk en deels in Hong Kong, maar as reis- en natuurfotograwe en skrywers is hulle dikwels op die pad. Hulle het die prag van verskeie streke gedokumenteer, onder meer dele van Asië, Ysland, Ethiopië en Namibië.
Michel Detay het ’n doktorsgraad in geologie en het reeds talle publikasies die lig laat sien, van wetenskaplike referate en naslaanboeke tot populêre artikels. Hy en sy vrou, Anne-Marie, was albei in korporatiewe loopbane betrokke – totdat hul liefde vir die aarde hulle laat besluit het om natuurwonders wat die gevaar loop om te verdwyn, in woord en beeld vas te vang.
Noordoos van Omaruru kan jy die versteende voetspore van ’n dinosourus besigtig
Het jy geweet?
*Die Namib-woestyn is een van slegs tien internasionale dark sky reserves in die wêreld; weens die relatiewe afwesigheid van industriële en stedelike ligbesoedeling bied dit van die donkerste nagte en dus helderste sterrehemele op aarde.
*Die Namib-woestyn word beskou as die oudste woestyn op aarde en strek meer as 2000 km langs die Atlantiese kus, van die Olifantsrivier in Suid-Afrika tot by die Carunjamba-rivier in Angola.
*Sowat 131 miljoen jaar gelede was die huidige Etendeka-plato in die Kunene-gebied die verhoog waar een van die grootste en gewelddadigste vulkaniese uitbarstings ooit plaasgevind het.
*Namibië bied besoekers van die beste besigtigingsgeleenthede van meteoriet-landingsplekke op aarde, asook die kans om aan hierdie “verskietende sterre” te raak.
*Noordoos van Omaruru kan jy die versteende voetspore van ’n dinosourus in die Etjo Sandsteenformasie besigtig.
*Die Visrivier-canyon is Afrika se grootste, en slegs die Grand Canyon in die VSA is groter en imposanter.
*Die Namib-Naukluft Park se sandduine is van die hoogste ter wêreld.
Kry meer inligting oor Geological wonders of Namibia (uitgewersprys R200) by penguinrandomhouse.co.za
Lees Meer
