Die fantastiese verdwyning van Charlie Prins vertel die verhaal van Charlie en haar ma, Ilse, wat by een van Ilse se universiteitsvriende in ’n nuwe dorp gaan woon. Charlie sukkel om aan te pas en vind vrede in haar sokkies en die klassieke boek Alice se avonture in Wonderland. Sy verbeel haar dat sy haarself ook soos die Chesire kat kan uitvee en kamoefleer soos sy wil.
Twee van die seuns in haar klas, Jarryd en Ethan, moet ’n taak oor ’n Afrikaanse boek doen. Ethan nader Charlie om saam met hulle daaraan te werk en die drie word vinnig vriende. Alles verloop glad tot ’n plasing op Instagram Charlie en Ilse se nuwe blyplek onthul en hulle verlede hulle begin inhaal …
“Francois Nolte, die uitvoerende vervaardiger by Green Planet Productions wat vir die fliek verantwoordelik is, is gereeld in kontak met seker die suksesvolste en talentvolste jeugskrywer in die Afrikaans, Jaco Jacobs,” verduidelik Réze Fox van Green Planet Productions. “Jaco is ’n kookpot van idees en Die fantastiese verdwyning van Charlie Prins was een van die idees waarmee hy vorendag gekom het.”
Méla Swanepoel is te sien as Charlie, Dirk Jacobs is Ethan en Rico Immelman is Jarryd. Christel van den Bergh is Ilse, Charlie se ma, en ander bekendes in die rolverdeling sluit in Pierre Breytenbach, Mandi Baard, Reandi Grey, Zak Hendrikz, Christo Davids en Lizz Meiring. Die akteur en TV-aanbieder Francois Jacobs is die regisseur.
Wat maak Die fantastiese verdwyning van Charlie Prins ’n fliek om beslis te kyk?
“Dit het ’n lekker kinkel in die kabel as dit by een van die hoofkarakters kom, maar ons gaan nie te veel uitlap nie. Al wat ons wel sal sê, is dat hierdie Storiefilm oor jou tyd op die skoolbanke gaan en dit is iets wat altyd aanklank vind,” sê Réze. “Charlie, wat op soek is na haar eie identiteit, neem haar hele familie en vriendekring saam op hierdie ontdekkingsreis. Dis perfekte vermaak vir ’n Saterdagaand en almal – van ouma en oupa tot die kleintjies – kan saam kyk.”
- Die fantastiese verdwyning van Charlie Prins word op 2 September om 20:00 op kykNET, DStv-kanaal 144, uitgesaai en sal ook op Catch Up en DStv Stream beskikbaar wees.
KYK: Amptelike voorskou – Die fantastiese verdwyning van Charlie Prins
Lees ook: SA-legendes te sien in die fliekweergawe van Hans steek die Rubicon oor
