ARD Matthews, `n ikoniese figuur in Suid-Afrikaanse musiek met ‘n nalatenskap wat oor dekades strek, en Tanya van Graan, ‘n bekende aktrise wie se vertolking in die huidige MNET trefferreeks Summertide, die publiek se verbeelding aangegryp het, is meer as `n kragpaar, hulle is deesdae ook artistieke vennote.
Hul nuwe Afrikaanse enkelsnit “Die Rede” is Vrydag uitgereik. ARD het die liedjie `n rukkie terug reeds geskryf, maar nooit daarby uitgekom om dit op te neem nie. Toe hy en Tanya se paaie as paartjie kruis, was dit ‘n natuurlike gevolg – en hy het haar oortuig om saam met hom die liedjie op te neem.
Dit is ARD se eerste Afrikaanse liedjie en “simboliseer ‘n diep konneksie tussen my en Tanya. Ek het dit nie destyds geweet nie, maar ek het die liedjie eintlik vir haar geskryf,” vertel hy.
Dié glanspaartjie se liefdesreis het glo begin nadat Tanya die besluit geneem het om haar rol in die gewilde MNET-reeks Summertide te aanvaar terwyl sy een oggend op ‘n spesifieke bankie op Houtbaai-strand gesit het, die einste bankie waar ARD elke oggend sy handdoek los terwyl hy in die yskoue see gaan swem.
Foto: Verskaf/Marcos Cruz
ARD Matthews is ‘n ikoniese solo-kunstenaar en voorsanger van die gewilde groep Just Jinjer.
Tanya se reis van die skerm na die alteljee het vir haar gevoel soos ‘n natuurlike evolusie van haar kunstenaarskap, veral omdat sy nou saam met Ard kan leef en werk.
“Ons samewerking is meer as net ‘n projek, dit is ‘n bewys en ontgunning van ‘n liefde wat op die mees opregte en onverwagte maniere floreer. Dis asof ons persoonlike geskiedenisse en hoop vir die toekoms, soomloos in ‘n gedeelde kreatiewe visie saamsmelt,” vertel sy.
Foto: Verskaf/Marcos Cruz
Die video van “Die Rede” is volgens die paar ‘n spontane verfilming van tyd wat hul saam spandeer het, die meeste daarvan terwyl hulle in die motor ry en sing.
Tanya vertel, “dis vir ons ‘n organiese keuse, ons is nie net twee sangers wat saamwerk nie, ons is gelukkig saam en ons sing dit vir mekáár.”
KYK | Die Rede – ARD matthews met Tanya Van Graan
Stroom “Die Rede” hier.
Lees ook: Vyf-vinnige-vrae met Riaan Grobler, ’n meester van musiek en stories
