Maak jou hoë hakke meer gemaklik. Deur Susra Matthee.
Koop die regte grootte
Dit klink voor die hand liggend, maar wanneer laas het jy jou voete laat meet voor jy skoene koop? Voete kan groter word soos ons ouer word. Swangerskap kan ook langer of breër voete tot gevolg hê. Daarom is dit noodsaaklik om jou voete te meet voor jy skoene koop. Maak seker daar is ’n duim-wydte tussen jou langste toon en die voorkant van die skoen om jou tone ruimte te gee vir beweging.
Moenie té hoog gaan nie
’n Hak van tot 5 cm is ’n goeie opsie vir gemak en gesondheid. ’n Katjiehak is baie makliker om in te stap as ’n hoë hak en is ook ’n goeie keuse vir werk. Dit is netjieser as ’n plat skoen, maar gemaklik genoeg om die hele dag te dra. Vermy spykerhakke wat onnodige druk op die bal en bene aan die voorkant van jou voet plaas.
Ekstra kussings
Wanneer jy skoene koop, kyk vir skoene met ’n effense kussing by jou toon- en hakdeel. ’n Alternatief is om inglip jel-sole te koop en dit in jou skoene te sit. Dit help veral wanneer jy hakke dra wat jou gewig ten volle op die bal van jou voet verskuif. Die jellieagtige kussings kleef vas aan die binnekant van jou skoene en onder die bal van jou voet en bied die nodige ondersteuning.
Hou by leer
Sintetiese materiale laat nie jou voete asemhaal soos natuurlike vesels en buigsame materiale nie. Leer neem die vorm van jou voete aan en gee mee, wat minder wrywing en blase veroorsaak. Hou wel in gedagte dat egte leer uitrek, dus as hulle te groot is wanneer jy die skoene koop, sal hulle nog groter word.
Dik hakke
Mens kan nooit verkeerd gaan met ’n dik hak nie. Dit is meer stabiel as ’n stiletto, en baie meer gemaklik. Wighakke is die gemaklikste van die hoëtrappers, aangesien jy nie druk op die voetsole van jou voete plaas nie. Wighakke is ook ’n goeie keuse vir buitelug-geleenthede omdat jy nie met jou hakke in die gras beland nie.
Koop skoene aan die einde van ’n dag
Om te verseker dat jy met gemaklike hakke huis toe gaan, koop skoene aan die einde van die dag wanneer jou voete op hul grootste is. Jou voete is die kleinste wanneer jy wakker word. Wanneer jy begin rondloop en meer bloedsirkulasie plaasvind, sal hulle stadig begin vergroot.
Wissel dit af
Om hakke vir ’n paar dae in ’n ry te dra kan jou voete verniel. Wissel tussen hakke en platter skoene. Alhoewel hakke jou bene verleng wanneer jy ’n rok dra, is dit minder belangrik wanneer jy ’n broek dra. Gee jou voete ’n blaaskans op daardie dae.
Hoe loop jy?
Jou postuur en gewigsplasing is nie dieselfde in jou hakke as wanneer jy met plat skoene loop nie – jy moet aandag gee aan die res van jou liggaam. Trek jou maagspiere in en stap van hak-tot-toon om jou voete die beste kans te gee om die aand te oorleef.
Loop dit in
Voordat jy jou hakke na ’n geleentheid dra, loop ’n paar keer daarmee deur die huis. Die kouse sal spesifieke areas van die skoen rek wat andersins jou voete kon seermaak. Moet ook nie nuwe hakke vir te lank op ’n slag dra nie. Dra dit vir ’n uur of twee en vervang dit met ’n gemaklike skoen, totdat dit jou nie meer seermaak nie.
Hooffoto: Snack Toronto vir Pexels
Lees Meer
