Watter materiale kan jy dra?
Satyn
Satyn word uitgeken aan die een kant wat blink en die ander kant wat dowwer vertoon. Die gare word in ’n baie spesifieke tegniek geweef om die sysagte, vloeiende vorm te kry, daarom is dit een van ons gunstelinge tydens ’n sonverbrande fase.
Sy
Sy word as die luukser weergawe van satyn beskou. Dit is ’n natuurlike proteïenvesel wat oorspronklik van ruspes en moerbei-sywurms verkry is. Die wildesy is aansienlik duurder as die sy wat vir massa-mode gebruik word wanneer dit met ander stowwe gemeng is.
Sjiffon
Sjiffon is vroeër jare slegs uit sygare vervaardig, wat dit ook daardie kenmerkende sagte gevoel gee, maar met die ontwikkeling van massa-mode is nylon en poliëster eerder gebruik. Dit word herken aan sy deurstigtige voorkoms en net-tekstuur.
Materiale wat jy moet vermy
Denim
Hoewel denim ’n geliefde materiaal is, sal jou gunsteling jean of baadjie ongelukkig vir ’n rukkie in jou kas moet bly. Die some en stik-detail is geneig om hard te wees en kan jou vel skaaf. Dit is ’n stywer materiaal wat veroorsaak dat dit teen jou vel skuur as jy baie rondbeweeg.
Stywe rekke
’n Stywe rek is opsigself ’n ongemaklikheid en dit is net nóg erger as jy deur die son gebrand is. Rompe en afskouertoppies is geneig om stywer rekke te hê omdat dit spesifiek bo moet bly – selfs frokkies met dun bandjies kan ’n suur gesig veroorsaak. Vermy ook bra’s wat styf sit – as dit moontlik is, kies vir die rukkie wanneer jy die ergste seer het ’n bralette of ’n sagte sportbra met dik bande wat nie te styf teen jou vel druk nie.
Te veel detail
Kledingstukke met baie borduurwerk, blink knoppies en aanstryklappies is geneig om harde gedeeltes op die materiaal te vorm en kan jou vel seermaak. Hou eerder by eenvoudige items en maak seker dat ’n item wat wel versier is, uitgevoer is.
