M-Net het die afgelope paar jaar hulle belegging in plaaslike inhoud stadig maar seker verhoog en vervaardig nou programme in verskeie inheemse tale vir kykers.
Die opwindende nuwe sepie, Suidooster, bring die talente van top Suid-Afrikaanse sterre bymekaar, terwyl dit ook vir plaaslike akteurs en tegnici ’n waardevolle platform sal bied om hulle talente ten toon te stel. Dit word verwag dat die nuwe sepie ’n bydrae sal maak tot die skepping van meer werksgeleenthede in die televisie- en vermaaklikheidsbedryf in Suid-Afrika.
M-Net se direkteur van Afrikaanse kanale, Karen Meiring, het die volgende te sê oor die ontwikkeling van Suidooster:
“Binnelanders en Villa Rosa, ons twee mees gewilde kykNET-sepies, speel onderskeidelik in Pretoria en Bloemfontein af – dis nou tyd dat ons ook in die Wes-Kaap ’n sepie kry. Suidooster bied ons hierdie geleentheid, en gaan net nog meer boeiende stories vir ons kykers tot gevolg hê. Al is die Wes-Kaap Suidooster se tuiste, is die storielyne universeel en ons sien uit daarna om dit met Afrikaanse kykers regoor Suid-Afrika te deel,”
Suidooster sal elke Maandag, Dinsdag en Woensdag vanaf 16 November om 20:00 op kykNET & Kie (DStv kanaal 145) uitgesaai word.
Vir meer inligting oor kykNET kanale en programme, besoek www.kykNET.tv. Vir meer inligting oor DStv pakkette gaan asseblief na DStv.com toe.
