Hoe dikwels dra jy lipstiffie?
Elke dag – selfs al klim ek Tafelberg dra ek lipstiffie.
Watter kleur/e verkies jy?
Bloedrooi, helderpienk en oranje is my gunstelingkleure.
Hou jy van lipstiffie met ’n geur?
Nee, geen geur, net kleur – hoe helderder hoe beter.
Hoe kies jy ’n lipstiffie?
Instink – ek weet watter handelsmerke ek verkies. Chanel en MAC is my gunstelinge.
Het jy ’n assosiasie met lipstiffie uit jou kleintyd – dalk hoe jou ma dit gedra het, of ’n ander herinnering?
My ma en haar moeder het altyd bloedrooi lipstiffie gedra. Dus was rooi lipstiek soos tandeborsel ’n moet, ten minste 2 maal per dag.
Kan jy onthou wanneer jy die eerste keer lipstiffie gedra het?
Ek dink ek het met rooi lipstiek gespeel nog voor ek met kryte begin teken het – seker in my gene.
Wanneer kan ’n meisie lipstiffie begin dra?
Matriek. Ek het eers begin grimering dra in Graad 12.
By watter geleentheid het jy gevoel jou lipstiffie het ’n merkbare effek op ’n man, of dalk op vriendinne, ’n gehoor, of jouself?
Dit is beslis my kenteken. As ek nie rooi lippe aan het nie, stap mense in die dorp na my toe en vra of iets fout is met my!
Is dit vir jou onaangenaam as jy iemand soen en hulle lipstiffie gee af, of ken jy ’n man wat daarvoor gril?
Nee glad nie. My man is so gewoond aan my rooi lippe, hy vry maar rondom dit!
Het lipstiffie nog funksies behalwe om vroue mooier te laat lyk – teken jy bv. ooit daarmee?
Ek soen altyd al my CD’s nadat ek dit vir mense geteken het. Wanneer ek kaartjies skryf, soen ek ook altyd by my naam en gooi blinkers in die koeverte.
Bespaar jy ooit op lipstiffie?
Nooit ! ’n Vrou moet nooit bespaar op lipstiffie en parfuum nie.
Lees Meer
