’n Mat vir elke smaak

Kleur

Kleur is die beginpunt van jou keuse. As jy reeds ’n kleurvolle vertrek het, kies ’n eenvoudige mat in die skakering van een van jou hoofkleure. As jy lus is vir ’n kleurvolle mat, is dit makliker om eers die mat en dan die meubels aan te koop.

Neem ook die skakerings van jou mure en ander vloerbedekking in ag. As jy neutrale meubels het, is ’n oordadige en kleurvolle mat net wat jou vertrek nodig het om dit tot die volgende vlak te neem.

Tekstuur

’n Vertrek met ’n mengsel van verskillende teksture kom ryk en en warm voor. Daarom is die tekstuur van jou mat baie belangrik. Die keuses in teksture is eindeloos.

Laat die res van jou meubels jou in hierdie keuse lei. Fluweel-bekleedsel en sisal is goeie pasmaats. So ook die kombinasie van ’n leerbank en ’n langhaar skag.

Grootte

’n Los mat behoort so groot te wees soos jou sit-area. Al leun net die voorste voetjies van jou meubels op die rand van die mat, is dit reg. Onder ’n eetkamertafel behoort jy jou stoel te kan uittrek terwyl dit steeds op die mat rus.