Italiaanse worsiepasta

Genoeg vir 4

Bestanddele

• olyfolie
• 1 ui, gekap
• 1 knoffelhuisie, gekneus
• 1 rissie, pitte verwyder en fyn gekap (opsioneel)
• 2 selderystokke, gekap
• 2 middelslagwortels, fyn gerasper
• 800 g (sowat 8) Italiaanse worsies
• 400 g pennepasta
• 500 ml (1 bottel) passata (Italiaanse tamatiesous)
• hand vol basiliekruid

Metode

1. Maak ’n groot kastrol drie kwart vol water en geur met ‘n knypie sout. Bring tot kookpunt.
2. Verhit solank olie in ’n groot pan oor matige hitte en soteer die uie, knoffel, rissie, seldery en wortels tot sag en ligbruin. Geur na smaak.
3. Sny die een kant van die worsies se omhulsel oop en knyp happiegroottes van die vleis uit die sakkie en laat val direk in die pan. Braai vir 5 min.
4. Voeg die pasta by die kookwater en kook volgens die aanwysings op die pak.
5. Gooi die passata by die groente en kook vir nog 5-10 min.
6. Dreineer die pasta en meng deur die passatamengsel. Strooi basiliekruid oor.