Parfuumtruuks
Mik vir die polspunte
Ons is so geneig om holderstebolder parfuum op enige gedeelte van ons lyf aan te wend. Daar word egter aanbeveel dat jy op jou polspunte moet fokus. Hierdie gedeeltes gee die meeste hitte af en speel ’n groot rol in die vrystelling van jou parfuum se reuk.
Wend dit hier aan:
- Agter jou knieë
- Aan jou gewrigte
- Agter jou ore
- Bokant van jou elmboog
- Onder jou naeltjie
- Aan jou nek
Moenie dit invryf nie
Nog ’n flater wat ons gereeld begaan, is om die parfuum in die vel in te vryf – dink byvoorbeeld aan hoeveel keer jy jou polse teen mekaar vryf nadat jy parfuum daaraan gespuit het. Die wrywing veroorsaak dat jou vel warmer word wat die parfuum se topnote laat afneem en die reuk benadeel.
Hoe vogtiger jou vel, hoe beter
As jou vel baie droog is, kan die parfuum vinnig verdamp. Ons stel daarom voor dat jy jou vel voor die tyd bevogtig met ’n geurlose room of deur ’n tikkie petroleumjellie op die plek aan te wend waar jy parfuum gaan spuit. Dit sal verseker dat jou parfuum vir langer aan jou vel bly.
Stoor dit op die regte plek
O ja! Waar jy jou parfuum stoor is ’n belangrike kwessie om in ag te neem as jy wil hê die geur moet vir lank hou. Humiditeit, hoë temperature en water kan die note in jou parfuum laat afneem. Moet dus liefs nie jou gunsteling-botteltjie in die badkamer (of enige ander plek in die huis wat voldoen aan die bostaande kriteria) stoor nie.
Woorde: Bianca Muller
Hooffoto: Cottonbrof vir Pexels
Lees ook: 5 wenke vir droë sjampoe
Lees Meer
