Wat jy nou moet weet oor suikerplaasvervangers deur Salomé Delport
Wat jy nou moet weet oor suikerplaasvervangers
Banting en soortgelyke diëte is vir suikertande ’n bitter pil.
Maar dankie tog vir soet-sonder-sonde suikerplaasvervangers.
Maar nou sê ’n Israeliese navorser, dr. Jotham Suez en sy span van die Weissman-instituut in Israel, hulle is te goed om waar te wees.
Die span het die dermflora van 400 mense ondersoek wat daagliks suikervervangers gebruik om vas te stel wat suikerplaasvervangers aan die mikroflora in jou dermkanaal doen.
Lees ook: Dis hoekom jy nou dadelik suiker moet sny
Die resultaat?
Drie verrassings:
1. Jou dermflora is anders
Mense op suikerplaasvervangers het ’n ander samestelling van dermflora as mense wat dit nie gebruik nie.
2. En só lyk die samestelling
Nóg verrassender: dié samestelling is identies aan dié van mense wat baie oorgewig is.
Gebruikers het ook hoër vastende bloedglukosevlakke gehad en groter glukose-intoleransie. Met ander woorde hul bloedsuikervlakke dui op vroeë diabetes.
Lees ook: 41 ander woorde vir suiker waarvan jy nou moet weet
3. En só lyk bloedsuikervlakke
3 In hul volgende ondersoek het hulle sewe mense wat nooit suikerplaasvervangers gebruik nie, op ’n week lange dieet met ’n hoë persentasie suikerplaasvervangers gesit.
Ná net vier dae het vier van die mense se bloedglukosevlakke gestyg pleks van gedaal en was die samestelling van hul dermflora reeds soos dié van oorgewig mense en diabete.
Suez verduidelik in Nature dat jou dermflora in twee groepe verdeel kan word: die bakteroidete en firmiekiete. Oorgewig mense het tipies meer firmikiete en minder bakteroidete as skraal mense. Firmikiete verander die manier waarop jou liggaam energie verbrand en help vermoedelik oorgewig aan.
In ooreenstemming met die teorie dat oorgewig en firmikitiese dermflora mekaar aanhelp, glo die span suikerplaasvervangers het presies dieselfde uitwerking op die dermflora as suiker en dra net soos suiker tot die oorgewig-epidemie by.
Wat beteken dit vir jou?
As diabetes en/of oorgewig in jou gene loop, is dit wys om jou suikertand te trek en suiker én suikerplaasvervangers te beperk tot daar meer klaarheid is.
Lees ook: 10 terme wat almal moet keen oor diabetes, insulienweerstandigheid en bloedsuiker
