Hoe om te spaar op jou versekering deur Anet Schoeman. Inligting verskaf deur Johan van Greuning, hoof van Standard Insurance Limited by Standard Bank. Hierdie artikel het oorspronklik in die November 2015-uitgawe van rooi rose verskyn.
Spaar op jou versekering
Jou huis
1. Goeie sekuriteit is goedkoper
Hoe beter jou sekuriteit, hoe goedkoper jou versekering. Bring diefwering, sekuriteitshekke en elektriese drade aan en koppel jou alarm aan ’n gewapende reaksie-eenheid.
2. Self-verseker hierdie items
Self-verseker items soos jou skootrekenaar en selfoon wat maklik gesteel word: spaar geld tot jy die vervangingswaarde bereik en trek dan rente daarop in die bank.
3. Instandhouding is belangrik
Hou instandhouding op jou huis op datum. As jy skade het weens verwaarlosing, kan die versekering weier om uit te betaal.
4. Kry ’n kluis hiervoor
Bêre kosbare juwele wat jy nie dra nie in ’n kluis, of by die bank, eerder as om dit te verseker.
5. Wees slim hiermee
Wees verstandig: As jy huishoudelike versekering uitneem, moet jy ’n waarde aan jou huishoudelike items heg. As jy dit vir R100 000 verseker, maar dis eintlik R200 000, gaan die versekering net
50% van jou eis uitbetaal.
6. Rooksensors is ’n moet
Rooksensors is goedkoop en is ook ’n veiligheidsmaatreël.
7. Sit dit af!
Skakel jou geiser af as jy op vakansie gaan. Jy spaar elektrisiteit, maar dit keer ook moontlike skade as jou geiser sou bars. Vra ’n loodgieter om ’n pan onder jou geiser te installeer met ’n uitlaat wat water na buite sal lei, sou dit bars.
Jou voertuig
1. Wees eerlik
Wees eerlik oor wie die gereelde bestuurder is, vorige ongelukke, waar jou voertuig saans geparkeer is, en sluit die garage as dit ’n voor-waarde is. Andersins word jou eis geweier.
2. Installeer hierdie twee dinge
Installeer ’n alarm en opsporingstelsel.
3. Vind veilige parkering
Parkeer indien moontlik in ’n garage wat kan sluit, of agter geslote hekke.
4. Vinniger, beter, maar duurder
Enige veranderings om jou enjin aan te jaag, jaag jou premie ook op.
5. Waarvoor betaal jy nou eintlik?
Kyk waarvoor jy betaal. As jy nie ’n gehuurde motor nodig het as jou voertuig beskadig is nie, is jou premie laer.
6. Hierdie dinge laat jou meer uit die sak haal
’n Groter enjin en sekere soorte verf verhoog jou premie.
7. Bestuur beter
Doen ’n gevorderde bestuurskursus. Dit maak van jou ’n veiliger bestuurder en kan jou premie verlaag.
8. Padwaardigheid is belangrik
Maak seker jou voertuig is padwaardig. Gladde bande of stukkende ruitveërs kan jou eis affekteer.
Lees Meer
