Hoekom jy in linne moet belê

Hoekom jy in linne moet belê deur Cornel Dunn. Hooffoto:  Logan Nolin vir Unsplash

Wat is linne?

Linne word van die natuurlike vesel van die vlasplant gemaak en kom hoofsaaklik uit Europa. Belgiese linne word as die beste linne ter wêreld beskou.

Lees ook: Hoe om jou matras skoon te hou

Die voordele van linne

Linne is bekend vir sy verkoelingsvoordele. Wanneer linne met jou vel in kontak kom, word sweet geabsorbeer. Die materiaal swel dan en skei vog af wat jou bed koel laat.

Linnebeddegoed is ideaal vir die somer maar kan deur die jaar gebruik word met ’n ekstra kombers.

Nog ’n voordeel is dat linne pluisvry en anti-allergies is.

Lees ook: Die beste raad vir stofmyte

Sorg so vir jou linne

Was jou linne weekliks met ’n sagte wasmiddel in koue water.

Droog verkieslik op ’n wasgoedlyn.

Vermy  versagmiddels wat silikoon bevat. Dit vorm ’n laag op die vesel wat keer dat die beddegoed vog absorbeer.

Indien jy ’n tuimeldroër gebruik, verwyder dit onmiddellik ná die siklus voltooi is. Linne kreukel maklik van hitte.

Stoor die linne in ’n droë, goed geventileerde plek. Vermy plastieksakke of -dose as stoorplek. Die linne sal geel word.

Lees ook: 14 plekke waar stofmyte in jou huis skuil

Wie sal van linne hou?

Warm slapers sal die koel effek van hierdie beddegoed waardeer. Ook allergielyers sal daarby baat vind wanneer hulle saans onder suiwer linnelakens inskuif. Omdat linne swaarder as katoen is, kan dit vir sommige ’n aanpassing wees.

Lees ook: Pak jou somerlinne só weg

Hoe lank hou linne?

Linne kan binne vyf jaar tekens van verweer toon. Met goeie sorg kan jy die leeftyd met dekades verleng. Voor jy koop, bestudeer die digtheid van die weefsel. Baie los geweefde linne sal nie so lank hou nie. Duurder produkte sal definitief die toets van tyd deurstaan.

Lees ook: Hoe om die regte kussings vir jou te kies

In ’n neutedop

Omdat linne ’n luukse-item is, is dit ook ’n belegging. Linne het ’n heel ander gevoel as katoen of perkal en sal nooit so sag soos katoen of perkal wees nie.

Lees ook: Die 5 belangrikste beleggings vir jou huis