5 mooi ligte wat jy self kan maak

5 mooi ligte wat jy self kan maak deur Cornel Dunn. Foto’s: Johan Wilke

Hier is 5 oulike idees hoe jy interessante ligte in jou huis kan maak!

Dis altyd teetyd!

Grawe daardie ou teekoppies uit wat jy nooit gebruik nie en omskep dit in ’n unieke hanglamp vir jou teetafel.

Ons het die gaatjies met die diamantpunt van ’n elektriese boor geboor en die pierings met epoksiegom aan die koppies vasgeplak.

#rrWenk: Gebruik ’n gloeilampie met ’n lae elektriese stroom, soos wat later vir die Bashew-botteltjies gebruik is (sien onder).

Koel(drank) botteltjiebeligting

Bashew’s, die oudste koeldrankhandelsnaam in Suid-Afrika, se ikoniese koeldrankbotteltjies maak lampskerms met ’n prettige verskil!

Sny die botteltjies aan die onderkant met ’n glassnyer oop en verseël die bokant met ’n kurkprop.

’n Transformator en halogeengloeilampe van 20 watt en 12 volt is noodsaaklik om die elektriese stroom van 220 volt huishoudelike krag na 12 volt oor te skakel.

Lees ook: Laat jou sitkamer in juweelkleure skitter!

Foto: Johan Wilke

Om beter te kan sien, my kind

Hierdie mooi boekligte skep ’n sprokiesgevoel! Ek het hierdie boeke by ’n tweedehandse winkel opgespoor.

#rrWenk: Gebruik buisligte van 40 watt met 220 volt om te keer dat die boeke brand.

Lees ook: 10 dinge wat jy moet weet voordat jy jou eie tuiskantoor skep

Foto: Johan Wilke

Aardbolle vir wêreldreisigers

Ek het hierdie aardbolle by ’n straatverkoper aangeskaf.

Ek het hulle met ’n matmes netjies middeldeur gesny en as lampskerms vir my kantoor gebruik. Oulik, nè!

Lees ook: Maak die meeste van jou klein spasie!

5 mooi ligte wat jy self kan maak. Foto: Johan Wilke

Glase maak die mooiste patrone

Hier is dik glase gebruik.

Nadat ’n gaatjie geboor is wat groot genoeg is, is staalpenne met epoksiegom daaraan geheg. Die elektriese drade is deur die penne gelei voor die lampie gemonteer is.

#rrWenk: Onthou weer eens om ’n lae elektriese stroom soos in die ander voorbeelde te gebruik.

Lees ook: Dekor-inspirasie vir ’n seehuis