Wat jy nou moet weet van beurtkrag

Wat jy nou moet weet van beurtkrag deur Cornelia Postma. Hooffoto: AntonioGuillem / istock images

Suid-Afrika loop tans onder Fase 2-beurtkrag deur. Maar weet jy wat presies die fases beteken? Ons het gaan uitvind.

Eskom het die volgende fases aangekondig waarin hulle die beurtkrag implementeer:

Fase 1 is die kortste fase, aangesien jou woonbuurt slegs vir ’n 2.5-uur periode* sonder krag gaan wees. Fase 1 word tussen elke tweede en vierde dag geïmplementeer en is so kort aangesien Eskom in hierdie geval net nodig het om 1000MW te spaar om die nasionale netwerk weer stabiel te kry.
Fase 2 is net ’n dubbele dosis van fase een, want dit is ook min of meer 2.5-uur op ’n slag sonder krag, maar in hierdie geval is die kans dat dit een keer per dag gebeur groter, omdat Eskom 2000MW moet spaar om die nasionale netwerk weer stabiel te kry.
Fase 3 is weer net ’n dubbele dosis van fase 2, ook min of meer 2.5-uur op ’n slag sonder krag, maar hierdie beurtkrag kan tot drie keer per dag geïmplementeer word. Hierdie fase word ingestel as Eskom 4000MW moet spaar om die nasionale netwerk te stabiliseer.
Fase 4 is die ergste fase, maar tot dusver is hierdie fase nog nie in werking gestel nie, ook nie tydens 2008 nie. Hierdie fase hou onbeplande beurtkrag in wat enige tyd van die dag of nag kan plaasvind. Hierdie fase word net gebruik as Eskom die nasionale netwerk moet red van totale ineenstorting. Dit is dan Eskom se laaste toevlug om ’n algehele landwye ineenstorting te voorkom.

*beurtkragtye mag vanaf 2.5 uur per keer tot 4 uur vermeerder